Dobyćerjow wubědźowanja Łužiskeje filmoweje přehladki wuznamjenili

Choćebuz (KPo/SN/bn). „Gedenken“ rěka produkcija režiserow Anny Faroqhi a Haima Peretza, kotrejž přiznachu we wobłuku wubědźowanja Łužiskeje filmoweje přehladki wčera w połnym Choćebuskim kinje Weltspiegel hłowne myto w hódnoće 1 500 eurow. Krótkofilm powěda stawiznu něhdy bjezdomnych dźěći, kotřiž planuja zhromadnje ze socialnej dźěłaćerku, z architektom a ze stawiznarjom wutworić symboliski row na arealu bywšeho koncentraciskeho lěhwa w Jemjelnicy. We wopodstatnjenju jury rěka, zo „přeswědča pask z jasnymi wobrazami a jasnej rěču. Film skića cyle nowu perspektiwu na podawizny, kotrež su hižo dosć wobšěrnje wuswětlane.“