Budyšin (SN/bn). Stawizny na njewšědne wašnje sej wotkrywać je hłowny zaměr wólnočasneho projekta „Měšćanski kurs“ Budyskeho Friedricha Schilleroweho gymnazija a Archiwoweho zwjazka sprjewineho města za šulerkow a šulerjow 11. lětnika. Lětsa je so w tym zwisku cyłkownje 14 gymnaziastow podawkam před sto lětami wěnowało. Wuslědki swojeho slědźenja prezentowachu wčera pod hesłom „1920te lěta w Budyšinje – Kak ‚złote‘ su woprawdźe byli?“ na połnje wobsadźenej žurli Kamjentneho domu.