Wuspěšna premjera ludoweho dźiwadła w ludowym dźiwadle

Budyšin (SN/bn). Připowědźenju hóstneje režiserki Rosemarie Vogtenhuber wotpowědujo je Němsko-Serbske ludowe dźiwadło publikumej z premjeru lětušeje hornjoserbskeje inscenacije na hłownym jewišću předwčerawšim zabawnu, „w najlěpšim zmysle ludowu“ komediju wobradźiło. Wopytowarjo na po něhdźe dwěmaj třećinomaj wobsadźenej žurli dźakowachu so sobuskutkowacym z dołho trajacym přikleskom za wjeselohru Jana Drdeho „Hrěšna wjes abo Zabyty čert“. Ze sylnje agěrowaceho ansambla – wšitcy serbscy hrajerki a hrajerjo domu su do produkcije zapřijeći – zamóchu předewšěm hłownej antagonistaj Jan Mikan jako titulny „zabyty“ djas a Měrko Brankačk jako zastupjer „neoliberalneje hele“ kaž tež Marian Bulank jako Belcebub resp. kowar Kowar a hóstna hrajerka Helena Bětnarjec jako naiwnje njewinowata słužowna Maruška přeswědčić. Wjetšina dźiwadźelnikow sćělesnja dwě róli, štož woznamjenja za masku wulke wužadanje.