Berlin/Zhorjelc (SN/bn). Na zakładźe debitoweho romana Lukaša Ričela „Z pjašću do swěta bić“ ma nastać hrajny film. Wjerćenske dźěła chce Berlinska produkciska firma Chromosom-Film kónc lětušeho februara zahajić. Wjetšina dohromady něhdźe měsac trajacych natočenjow wotměje so w branši tež „Görliwood“ mjenowanym Zhorjelcu, hdźež z Worklec pochadźacy awtor tuchwilu bydli a skutkuje. Dźěl filmowanja ma so nimo toho na „originalnych hrajnych městnach w Hornjej Łužicy z hrajerkami a hrajerjemi regiona“ zwoprawdźić. Za to pyta Berlinska agentura Filmissimo, kotraž bě a je prawidłownje na přikład do serijow kaž „Tatort“ a „Polizeiruf 110“ abo do filmow kaž „Alfons Zitterbacke – Das Chaos ist zurück“ a „Schubert in love“ zapřijata, tele dny tak mjenowanych předstajerjow małych rólow (Kleindarsteller) a komparsow. „Posrědkujemy přewažnje dorosćenych, potajkim ludźi wot 18 lět hač do wysokeje staroby, zo bychu na přikład dróhu wožiwili, kofejownju pjelnili, kupjel wopytali abo so wo połny nakupowanski centrum postarali“, kaž nawodnica agentury Antje Mews na naprašowanje zdźěli.