Dobra nalada na dźěłarničce přichoda LND běše generator nowych idejow

Budyšin (SN/MiP). „Konkretne ideje modernizacije za kóždy wotrjad a wobłuk wuwić“ – pod tutym hesłom su so sobudźěłaćerjo Noweho Casnika, Rozhlada, Serbskich Nowin, knižneho wobłuka kaž tež wšitkich dalšich wotrjadow Ludoweho nakładnistwa Domowina (LND) pjatk tydźenja na dźěłarničku přichoda zešli. Přeprosyłoj běštaj Jan Budar, direktor Załožby za serbski lud, a Syman Pětr Cyž, jednaćel LND do bašty Serbskeho ludoweho ansambla (SLA).

Pod nawodom nazhoniteje moderatorki Lipšćanskeje agentury design2sense, Gabriele Church, běše na kóncu tafla za kóždy wotrjad nakładnistwa z idejemi za štyri strategiske wobłuki pjelnjena. Wobłuki běše jednaćel LND na spočatku zarjadowanja definował: digitalna transformacija, wabjenje dorosta, rozšěrjenje dotalneje wobchodneje dźěławosće a natwar nowych wobchodnych wobłukow.