„Texasko-serbski Nowinkar. The Newsletter of the Texas Wendish Heritage Society“ je wot lětušeho nowe mjeno časopisa serbskeho towarstwa w Texasu. Dotal měješe časopis ryzy jendźelski titul „Texas Wendish Heritage Society Newsletter“. Redaktor Jeremy Clifton bě spočatk lěta za nowym, bóle na serbsku tradiciju nawjazacym mjenom pytał. Po internetnych rešeršach měješe ideju za titul „Texasko-serbski powědar a kurěr“, štož pak by za jendźelskorěčnych čitarjow chětro dołhe a komplikowane pomjenowanje było. Tohodla přiwza rady namjet z Łužicy, wužiwać słowo nowinkar.