Hornjołužiske nakładnistwa hotuja so na Lipšćanske knižne wiki

Budyšin (SN/bn). „Wjeselimy so jara, so po třilětnej přestawce zaso na Lipšćanskich knižnych wikach prezentować móc. Kaž je zastupowacy ministerski prezident Sakskeje Martin Dulig něhdy rjekł, su tele wiki najwažniše wukładnišćo za wuchodoněmske nakładnistwa, a chcu dodać: předewšěm za hornjołužiske nakładnistwa.“ Z tymle słowami zahaji jednaćel Ludoweho nakładnistwa Domowina (LND) Syman Pětr Cyž wčerawšu zhromadnu nowinarsku konferencu cyłkownje pjeć regionalnych zhotowjerjow a rozšěrjerjow knihow w Budyskej Smolerjec kniharni, z kotrejž chcychu swój program za dźensa zahajace so wiki předstajić. „Hladajo na za branšu dosć wobćežowace połoženje – powyšacych so kóštow za papjeru kaž tež za energiju dla dyrbjachmy płaćizny za naše wudźěłki přiměrić – změjemy w Lipsku składnosć, so direktnje z čitarstwom wuměnić a za naše knihi wabić“, Cyž podšmórny. Gunter Oettel z po nim pomjenowaneho Zhorjelskeho nakładnistwa nawjazujo wuzběhny, zo „su wiki stajnje tež dobra přiležnosć za ‚spionažu‘.