Zwjazkowa społnomócnjena Natalie Pawlik Myće Ćišinskeho lětsa přepoda

Budyšin (SN/at). Komu lětsa najwyše wuznamjenjenje Serbow spožča, je kuratorij myta při Załožbje za serbski lud wčera wozjewił. Z Mytom Ćišinskeho wuznamjenja Jurja Łušćanskeho, wuměnkarja w Budyšinje, „za jeho mnohostronske płódne kulturne a wuměłske skutkowanje“ a za jeho „wobstajne wudźeržowanje stykow k słowjanskim susodam na dobro serbskeho ludu“. Kreatiwne a zahorjace kulturne dźěło Gregora Kliema, hudźbneho redaktora Bramborskeho serbskeho radija w Choćebuzu, jeho zamóžnosć, wšitke generacije zwjazować kaž tež inowatiwne hudźbne projekty zeskutkownjeć ma so po rozsudźe kuratorija ze Spěchowanskim mytom Ćišinskeho počesćić (SN informowachu).