Z wulkim wuspěchom zakónčichu wčera „Błótowske powěsćowe nocy“

Bórkowy (SN/MG). Hdyž chcetaj so lutk Jorko a lutka Jolka woženić, je cyły powěsćowy hraj Błótow rozbudźeny. Hdyž je potom nahrabnosće ludźi dla hišće suchota wudyriła, je wobsah lětušich błótowskich powěsćowych nocow skoro rozpisany.

Na wšěch 5000 wopytowarkow a wopytowarjow dožiwi při krasnym wjedrje swjatkowneho kónca tydźenja sedmy a posledni dźěl stawiznow wo serbskim kralu Jurju. „Smy jara spokojom. Wothłós wopytowarjow je přewšo pozitiwny“, zdźěli nowinski rěčnik Serbskeho ludoweho­ ansambla, Štefan Cuška. Dohromady hižo 14. raz přeprosychu ansamblowcy, zhromadnje z mnohimi regionalnymi partnerami, na spektakl pod hołym njebjom. Bismarckowa wěža w Bórkowach je tradicionalna městnosć za produkcije ansambla k swjatkam.