Wustajeńca składnostnje stoćin Jana Buka dale rozrostła

Choćebuz (SN/bn). We wobłuku wosebiteje mjezynarodneje wustajeńcy „Wšo je krajina – Serbski moler Jan Buk“ (SN rozprawjachu) bu wčera w Choćebuskej „Starej płachtarni“ komplementarna přehladka pod hesłom „Nach der Kohle – Pó wuhglu – Po węglu“ wotewrjena. Ekspozicija je dźěl projekta „Hommage à Jan Buck (II)“ a pokazuje fotografije „krajinow a mjezwočow Łužicy“. Wobrazy Franka Höhlera, Thomasa Kläbera, Carle Pohl a Jürgena Maćija běchu w 1980tych lětach nastali a wotbłyšćuja předewšěm wudobywanje brunicy w „energijowym wobwodźe Choćebuz“. Nimo toho portretuja tójšto motiwow Jana Buka, kiž bě so tehdy na tak mjenowanych energijowych pleinairach, potajkim molowanjach pod hołym njebjom, wobdźělił. Někotre z fotow njeběchu drje dotal hižće ženje zjawnje wustajane. Přehladka je wotnětka hač do 27. awgusta přistupna.