Zhorjelc (SN/bn). Lětsa štwórty raz na hrajnišćach w 14 wsach a městach cyłeje Łužicy wuhotowany dwutydźenski Łužiski festiwal – prěni króć w zamołwitosći nowowutworjeneje towaršnosće z wobmjezowanym rukowanjom samsneho mjena (SN rozprawjachu) – skići z dohromady 35 zarjadowanjemi wospjet wotměnjawy program, wopřijimacy na přikład koncerty, wustajeńcy, inscenacije dźiwadłow a baletow, čitanja a dźěłarnički. Zazběh twori sceniski koncert „Verdi – Zimmermann“ 25. awgusta w Choćebuzu, zwoprawdźeny mjez druhim wot Drježdźanskeje filharmonije, Čěskeho filharmoniskeho chóra Brno a dźiwadźelnika Rainera Süßmilcha. Argentinska wirtuozowka na křidle Martha Argerich chce publikum znowa wobkuzłać, tónraz w Ochranowje; jazzowe duwo Wollny & Parisien wustupi mjez druhim w Běłej Wodźe a dźiwadźelnica Claudia Michelsen čita w Budyšinje powědančka pólskeje, z Nobelowym mytom literatury wu­znamjenjeneje awtorki Olgi Tokarczuk.