NSLDź swjeći załoženskej róčnicy z dohromady 24 (pra)premjerami

Budyšin (SN/bn). „Wosebitu hrajnu dobu z wosebitymi wjerškami“ připowědźiwši powita intendant Němsko-Serbskeho ludoweho dźiwadła Lutz Hillmann zastupjerjow medijow na wčerawšej nowinarskej konferency składnostnje předstajenja hrajneho plana sezony 2023/2024, kotraž je w štworym zmysle jubilejna. „Před 75 lětami bu Serbske ludowe dźiwadło jako prěnja profesionelna serbska institucija załožena. Z njeho a Budyskeho měšćanskeho dźiwadła wutwori so před 60 lětami NSLDź“, štož bě po słowach intendanta „najradźeniša fuzija jewišćow w Němskej“. Wobě narodniny swjeća spočatk decembra z prapremjeru dwurěčneje inscenacije „Schierzens Hanka“, kotruž je Esther Undisz po noweli Jurja Kocha „Židowka Hana“ spisała a kotruž su pod titulom „Šěrcec Hanka“ loni prěni raz w hornjoserbskej wersiji předstajili.