Krajna zhromadźizna němskich towarstwow w Čěskej republice je zašły kónc tydźenja do Prahi přeprosyła. Konferenca steješe pod patronatstwom čěskeho wonkowneho ministra Jana Lipavskeho a zamołwiteje němskeho zwjazkoweho knježerstwa za prašenja wusydlencow a narodne mjeńšiny Natalie Pawlik. Tema konferency w impozantnym twarjenju wonkowneho ministerstwa „Palais Czernin“ běše: „Identita a jeje wuznam za narodne mjeńšiny“. Młodźinska referentka Domowiny Virginia Hanuzowa je pod tematiskej rubriku „Wupruwowane přikłady z praksy“ serbski lud w Němskej a swoje dźěło z młodźinu prezentowała. Mjez wobdźělnikami běchu mjez druhim Retoromanojo ze Šwicarskeje, Němcy z Danskeje kaž tež Němcy z Pólskeje. W srjedźišću mjezsobneje wuměny steješe dopóznaće: Kóžda mjeńšina je nadhódnota za kraj, w kotrymž je žiwa – toho ma sej wona stajnje wědoma być. „Smy dźakowni za wědomostnu wuměnu a wjeselimy so na přichodnu konferencu, kotraž budźe za dwě lěće“, rjekny Virginia Hanuzowa.