Wot dźensnišeho wabi mjezynarodna filmowa scena zajimcow do Choćebuza. Milenka Rječcyna je so ze serbskej dźiwadźelnicu a filmowej hrajerku ze Smječkec Boženu Bjaršec rozmołwjała.
Sym z „nowych medijow“ zhoniła, zo sće minjeny čas do wjacorych filmowych projektow zapřijata była. Kotry z nich je najaktualniši?
B. Bjaršec: We wobłuku Choćebuskeho filmoweho festiwala prezentuje telewizijny magacin Łužyca sobotu prapremjernje pask „Serbska utopija, kapitl I: Nowy swět – Eine neue Welt“. Produkcija labela Lusatia Film je projekt serbsko-němskeje syće Łužycafilm.
Wo čim film jedna?
B. Bjaršec: Přizemimy ze slědźerskej swětnišćowej łódźu w lěće 2123 w Grodku. Tam namakamy wšelake artefakty ze zašłosće, kotrež na łužiskich Serbow pokazuja. Sceny hraja w starym domskim, kotremuž hrozy rozpadanje. Za film pak běše to krasna kulisa. Wšako smy w něhdyšim dožiwjenskim parku Serbow přizemili.
W kotrej rěči bu film nawjerćany?
