Budyšin (SN/MiP). „Na wulki zjězd chórow“ běchu organizatorojo rjadu póndźelnišich zarjadowanjow „Happy Monday – wjesoła póndźela“ zajimowanych na wčerawše wudaće prosyli. Hačrunjež pochmurjene wjedro a temperatura ze 16 stopjenkami přewšo přićahliwej njebyłoj – něhdźe 300 ludźi běše najebać to na wosme, předposlednje zarjadowanje na Žitne wiki přichwatało.

„Chceš-li zhromadnje spěwać, dyrbiš druheho słyšeć a wědomje wobkedźbować, zo by spěw derje zaklinčał. Kajki to překrasny přikład za zhromadne žiwjenje w našim měsće, w našej towaršnosći“. Z tymle słowami powita Christian Tiede, farar Budyskeje ewangelskeje wosady swj. Pětra, zajimcow a přeprosy jich na zhromadne spěwanje z chórami. Za to běše spěwanska brošurka wupołožena abo digitalnje z pomocu z QR-koda na šmóratku přistupna. W serbskej rěči postrowi publikum w mjenje Rěčneho centruma WITAJ (RCW) kaž tež Domowiny Beata Brězanowa, wjednica RCW.