Budyšin (SN/MG). „Die Sorben, die Wenden, die Sorbenwenden“ steji na sćěnowinje za Juliju Klingnerec, Marianom Bulankom, Gabrielu Mariju Šmajdźinej a Tomašom Kreibichom-Nawku napisane. Pod tutym hesłom čitaja Klingnerec, Bulank a Šmajdźina scenisce z twórbow něhdźe 15 serbskich spisowaćelkow a spisowaćelow. Kreibich-Nawka postara so wo hudźbne wobrubjenje wječora, kotryž zarjaduje Łužiski festiwal. Je to jedyn z třoch serbskich poskitkow. Wuměłski nawod naročneho pućowanja po serbskich wurostach duše a zmyslenja je Madleńka Šołćic přewzała, zhromadnje z dramaturgowku Heike Merten-Hommel bě wona koncept nadźěłała. Něhdźe połdra hodźiny hibaja so štyrjo akterojo na jewišću po linkach, kiž rysuja wobraz wo połoženju serbskeho luda, wo strachach a nadźiji. Častohdy su tež raz směšne wjerše a linki wobstatk programa. Zajimawe kompozicije skulojća předstajenje, kotrež wosebje cunje mjezyzynki wuběrnje wuhrawa.