Budyšin (CRM/SN). We wobłuku Dnja wotewrjeneho pomnika je ewangelska wosada swj. Pětra w Budyšinje předwčerawšim na wurjadny dźakny koncert přeprosyła. Před měsacami dźě bu jasne, zo žada sej hawarija na Eulowych byrglach, dotwarjenych w lěće 1910, dokładnu restawraciju tak mjenowaneho pišćeloweho hrajneho blida (kompleks manualow, pedalow a registrowych ručicow – přispomnjenje redakcije). Pišćeletwarski mišter Dirk Eule, jednaćel zawoda Hermann Eule, rozłoži zajimcam z pomocu projicěrowanych wobrazow wobjim fachowych naprawow, kotrež su trjeba, wažny dźěl „wulkeho a komplikowaneho instrumenta dospołnje wutwarić, wšón proch někotrych lětdźesatkow wotstronić, reparować, trěbne techniske změny přewjesć a skónčnje projekt z dobrym swědomjom zaso přepodać“. Farar Christian Tiede pak njedźakowaše so jenož na tradicije bohatej Budyskej firmje, kiž słuša k najwjetšim swojeho razu w Němskej, ale tež wosebje pomnikoškitej kaž tež dalšim sponsoram, kiž wobšěrnu restawraciju financielnje zmóžnichu.