Budyšin (SN/bn). Zběrka esejow „Serbstwo, quo vadis“, wušła w Ludowym nakładnistwje Domowina, bě z ćežišćom wčerawšeje, lětsa prěnjeje literarneje rozmołwy rjadu „tracTare“ w Smolerjec kniharni. Měrka Mětowa powita něhdźe 15 zajimcow w mjenje jón wuhotowaceho Zwjazka serbskich wuměłcow a přepoda słowo Měrćinej Wjenkej, kiž mjenowaše knihu w swojim zawodźe „dypk dołhodobneje debaty“, kotraž nawjazuje w Serbach na před 15 lětami zahajenu „diskusiju wo teoriji hybridnosće“. Antologija wopřijima „měšeńcu wólneho filozofowanja, swobodneje asociacije a reflektowanja swójskich nazhonjenjow dohromady 19 awtorkow a awtorow“ a wotpowěduje w zmysle Michela de Montaigne „žanrej, kotryž so krutych strukturow wzdawa. Wona budźe wid ludźi, kotřiž ju čitaja, šěrić“. Wjetšina přinoškow wotbłyšćuje po jeho słowach z wosobinskeje perspektiwy do powšitkowneho přešedši prašenja za (indiwidualnej) identitu; wuwzaći stej tekstaj „skerje spisowaćelsce postupowaceho“ Benedikta Dyrlicha kaž tež „trochu přebiografisce wróćo zhladowaceho“ Wernera Měškanka.