Budyšin (SN). „Bringing the baby home today“, tak tituluje Berlinjan Roman Wilhelm přinošk na swojim Instagram-profilu, po tym zo je serbsku knihu z 18. lětstotka Serbskej centralnej bibliotece (SCB) darił. Spočatk apryla dóńdźe mejlka Berlinjana do Serbskeho instituta (SI), w kotrejž rozprawješe wo njedawnym „wuchowanju“ knihi z 18. lětstotka na čaporowych wikach njedaloko Kostrzyna. Namakanka wukopa so jako woprawdźita žadnostka. Jedna so wo šesty nakład Noweho Zakonja w němskej a delnjoserbskej rěči z přełožkom Jana Bogumiła Fabriciusa z lěta 1788. Spóznawši kulturelnu hódnotu, wobroći so na SI kaž tež na Statnu biblioteku w Berlinje. Pytaše nowu „domiznu“ za knihu. Zwěsćiwši, zo so 6. nakład tutoho přełožka dotal nihdźe jewił njebě, zwurazni SCB hnydom zajim za knihu. Dotal wobsedźi SCB mjenujcy „jenož“ prěni, třeći, štwórty a pjaty nakład tejele wersije Noweho Zakonja.