Berlin/Köln (SN/bn). Tarifowe zrěčenja přistajenych dźiwadłow a koncertownjow w Němskej měli so tarifowemu zrěčenju za zjawnu słužbu (TVöD) přiměrić. Tole žadaja sej Drustwo němskich přisłušnikow jewišća (GDBA), Zjednoćenstwo němskich operowych a rejowanskich ansamblow (VdO) a Zwjazkowe zjednoćenstwo činohra (BFFS) kaž tež němski hudźbny a orchestrowy zwjazk Uniosono. Konkretnje woznamjenja to na přikład zwyšenje mzdy regularnych orchestrowych hudźbnikow wo 5,8 procentow, zwyšenje lěćnych resp. zymskich přiražkow a indiwidualnje planujomny swobodny dźeń wob lěto. Kónc junija su mjenowane dźěłarnistwa k symboliskemu stawkej namołwjeli, zo bychu ćišć na Němski jewišćowy zwjazk wukonjeli, kotryž dźěłodawarjow zastupuje. Tysacy profesionelnych wuměłcow, na přikład dźiwadźelnicy, klankarjo a hudźbnicy, kaž tež w branši přistajeni, kaž mjez druhim dramaturgojo abo sobudźěłaćerjo wobłukow technika, zarjadnistwo, maska a kostimy so na to po cyłej Němskej poł hodźiny dołho dźěła wzdachu.