Wuměłstwo, rjemjesło a kreatiwita zwjazuja wobdźělnikow 19. mjezynarodneje rězbarskeje dźěłarnički w Miłočanskej skale. Dwě njedźeli je dźewjeć wuměłcow z cyłeho swěta w kreatiwnej zhromadnosći dźěłało. Su swoje ideje do drjewa a wšelakich družin kamjenja přeměnili a cyle rozdźělne skulptury stworili.

Miłoćicy (SN/lmc). Ze swojej nowej skulpturu rězbar Bernhard Männel wobhladowarjow na cyle swójske wašnje puta. Jeho najnowša twórba předstaja rybu. Ryba pak njeje jedna z mnohich, ale cyle wosebita. „Njeje to jenož jednora ryba, ale karp, kotrehož pjericy so na prěni ­pohlad anatomisce korektne być nje­zdawaja“, wuměłc wujasnja. Płuwanske a wopušowe pjericy pokazuja doprědka, přećiwo přirodnym zakonjam. Tola runje to je wotpohlad. „Ryba ma kaž pućnik skutkować“, Männel wuswětla. „Pokazuje do wěsteho směra abo na něšto posta­jene, na wěcku, kotruž ma sej wobhla­dowar wotkryć.“