Něhdźe 15 000 wopytowarjow na 35 zarjadowanjach po cyłym regionje

Zhorjelc (SN). Koncert šansondiwy Uty Lemper w Němsko-Serbskim ludowym dźiwadle tworješe předwčerawšim finale lětušeho Łužiskeho festiwala. Tři tydźenje stejachu pod hesłom „unsbewusst“ w znamjenju wuměłskeje ekscelency a mnohotnosće: 13 městnow regiona sta so znowa z jewišćemi za dźiwadło, hudźbu, literaturu, tworjace wuměłstwo, reju, hudźbne dźiwadło a filozofiske diskursy. Dohromady bu na 35 předstajenjach 22 produkcijow na 19 hrajnišćach prezentowanych. Wuměłcy ze 16 krajow wustupichu w industrijowych halach, cyrkwjach, dźiwadłach, komunalnych zarjadnišćach abo kulturnych domach kaž tež před spektakularnej kulisu wuwozneho mosta F60 bywšeje jamy w Swětłej-Šachlejcach (Lichterfelde-Schacksdorf). Dźewjeć produkcijow bu prěni raz pokazanych, někotre z nich nastachu ekskluziwnje za festiwal.

Dohromady zličichu něhdźe 15 000 wopytowarjow, štož woznamjenja wućeženje 85 procentow – jasne to stopnjowanje porno předchadźacym lětam.