ZARI čestnohamtskim při zachowanju nazběraneje wědy poboku

Budyšin (SN/MiR). Syć za serbsku rěč a regionalnu identitu ZARI chce regionalnu kulturu sylnić. K tomu słušeja muzeje. Tuž poskićuje managerka za daty a posrědkowarka kultury pola ZARI Jadwiga Bryckec wustajenišćam aktiwnu podpěru. Kaž wona na naprašowanje SN praji, je „potrjeba jara rozdźělna. W prěnim rjedźe so wujewi, zo maja mjeńše muzeje a domizniske stwy personalne ćeže“, wona rjekny. Po wjetšinje skutkuja tam hižo mnohe lěta samsni ludźo čestnohamtsce. Trjebaja pak dorost, kiž by so wo zběrki starał, wustajeńcu dohladował a na prašenja wopytowarjow wotmołwjał.