SLA přihotuje jubilejny program składnostnje 50ćin comicsoweje trójki

Budyšin (SN/MiP). Lětsa woswjeća Abrafaxy wosebity jubilej. Hižo 50 lět dožiwja comicsowa trójka z nakładnistwa Mosaik na wuchodźe Berlina měsac wob měsac nowe dyrdomdeje na swojich pućowanjach po swěće, hdys a hdys pak tež w blišej wokolinje. Nic jenož mjez dźěćimi a młodostnymi woblubowane Abrafaxy běchu loni na přikład z Krabatom we Łužicy po puću, a to kołowokoło Čornochołmčanskeho Čorneho młyna. Stawiznu tutoho comica z titulom „Abrafaxy a Čorny młyn“ je komponist, awtor a lěkar Vinzent Strehlow z Lipska napisał a k tomu tež hudźbny kruch skomponował. Orchester Serbskeho ludoweho ansambla (SLA) je jón loni w nowembrje w formje koncerta z wobrazami a powědarjom w serbskej rěči předstajił.