Malešecy (SN/bn). Trójnu premjeru připowědźi rěčny motiwator Lucian Kaulfürst minjeny pjatk w Malešanskim hosćencu „Wódny muž“. Najprjedy předstaji wón Hagena Juracka jako nawodu znowazałoženeho towarstwa Nadźija. Zjednoćenstwo, kotrež nawjazuje na w lěće 1914 wutworjene a 1936 zakazane towarstwo ze samsnym mjenom, chce serbšćinu a serbsku kulturu w kónčinje šěrić, kotraž bě wot časa němskeho kejžorstwa a je zdźěla do dźensnišeho serbstwu napřećo skerje wotchilena. Aktualnje přisłuša towarstwu 15 čłonow.