Bilanca serbskeho nakładnistwa a wuhlad na lětuše předewzaća

Budyšin (SN). Ludowe nakładnistwo Domowina (LND) zhladuje na wuspěšne lěto 2025. „Hladajo na dochody běše lońše hospodarske lěto najwuspěšniše zašłych dźesać lět“ zdźěli jednaćel Syman Pětr Cyž. Wulki podźěl na tym měješe jubilejna kniha „Chrósćicy“, kotraž nawjeduje z wulkim wotstawkom wotbytkowu lisćinu loni w LND wušłeho knižneho programa. Wulkotna premjera krónowaše dołhi a naročny proces nastaća knihi, kotryž je nakładnistwo z pomocu lokalnych akterow zmištrowało. Mjeztym je najwjetši dźěl nakłada w rukach čitarjow. Ale tež titlej „Z Prahi do Palestiny“ a „Malešecy před 200 lětami“ stej čitarstwo putać zamóhłoj. W cyłku je nakładnistwo loni 39 000 knihow a dalšich wudaćow předało a hromadźe z předanju nowin a časopisow wjace hač 580 000 eurow wobrota nadźěłało.

Z tym přinošuje LND we wobłuku hospodarskeho plana Załožby za serbski lud ze wšěch přewažnje wot njeje spěchowanych serbskich institucijow najwjetši podźěl k dochodam ze swójskeje dźěławosće.