Premjera hornjoserbskeho ptačeho kwasa 2026 w Radworju

Radwor (SN/MkWj). Serbski ludowy ansambl je předwčerawšim, sobotu, w Radworju swój lětuši hornjoserbski program ptačeho kwasa prěni króć předstajił. Dobre 130 wopytowarjow premjeru w sportowej a wjacezaměrowej hali „Slavia“ sćěhowaše, to bě něšto mjenje hač minjene lěta. Z chórom, baletom a wulkim orchestrom Budyscy ansamblowcy wšě swoje profesionalne móžnosće zasadźichu.

Hladajo na wuspěch lońšeho ptačokwasneho předstajenja su sej zamołwići SLA lětsa wospjet Boženu Bjaršec a Marka Bulanka-Pašku za protagonistow přeprosyłoj. W srjedźišću lětušeho programa, kotryž bě bywši wjelelětny rejwanski dramaturg Jan Domaška zestajił, steješe tradicionalny katolski serbski kwas Kulowskich Serbow. Wšitke wažne elementy serbskeho kwasa běchu na jewišću widźeć, započawši z witanjom braški, kotrehož předstaješe Rüdiger Žur. Tež nadrobnosće, kaž rozžohnowanje njewjesty z kruha wjesnych holcow, buchu spěwajo předstajene.