„Skazany Pryzlak“ wočakowanja premjerneho publikuma spjelnił

Budyšin (SN/MG). Komedije su dźiwadźelnicy Němsko-Serbskeho ludoweho dźiwadła často předstajili. Tež zašłu sobotu, jako so zawěšk prěni raz za inscenaciju „Skazany Pryzlak“ zběhny. Kruch z pjera Larsa Albauma wopytowarjow na přijomne wašnje překwapi. Při tym wědźeše režiser Thorsten Köhler (jako hósć) wušiknje tež skerje chutne zynki do keklije zapřijeć. Köhler Budyske dźiwadło derje znaje, wšako je tam sam hižo jako dźiwadźelnik a nawoda Dźiwadłoweho kluba za młodych ludźi skutkował. Zhromadnje z dramaturgom Benjaminom Hrjehorjom (j.h.) a wuhotowarjom Justusom Saretzom (j.h.) postara so wo ra­dźeny a kulojty wječor, kotryž niwowej profesionelneho domu wotpowěduje.