Radwor (SN/MiR). Radworske towarstwo Dwórnišćo Inkluzije je zašłu sobotu na dalše zarjadowanje rjadu „Rjemjesło dožiwić“ projekta LEADER přeprosyło. Wjacore žony su so w předźenju wołmy a pjelsćenju wuspytali. Mjez nimi běštej Lucretia Brězanec-Wjacławkowa a Antonia Brězanec z delnich Sulšec. „Moja sotra, kotraž tule w susodstwje bydli, je mi zarjadowanje poručiła“, Lucretia Brězanec-Wjacławkowa rjekny. „Zajimuju so za ručne dźěło a sym so hižo doma w předźenju wołmy wuspytała. W zhromadnosći pak je wjeselo wjetše. Tuž so tónle poskitk derje hodźi, tež z widom na předmjet wuměłske kubłanje, kotryž jako wučerka na Budyskim Serbskim gymnaziju podawam.“ Za Antoniju Brězanec, kotraž studuje hojensku pedagogiku, běše poskitk tohorunja wužitny. „Mi je wažne, zo jako młodźi wěmy, kak su naši prjedownicy žiwi byli a na kotre wašnje su sej něhdy wšědne žiwjenje wolóželi a porjeńšeli. K tomu słuša tež ručne dźěło“, wona rjekny­.