Z hłowneje zhromadźizny serbskeho wědomostneho towarstwa

Budyšin (SN/bn). Maćica Serbska (MS), najstarše serbske towarstwo, je předwčerawšim na žurli Budyskeho Serbskeho muzeja swoju lětušu hłownu zhromadźiznu wotměła. Něhdźe 50 hosći powitawši zahaji Dietrich Šołta zarjadowanje z mjeńšinu ćišiny, z kotrejž přitomni loni zemrěteho Jurja Nuka wopominachu. Slědowaca rozprawa předsydki Anje Pohončoweje wujewi mjez druhim dźakowano dwěmaj nowymaj přistupomaj stabilnu ličbu čłonstwa a kopicu aktiwitow w minjenych dwanaće měsacach. Wosebje wuzběhny wona wuspěšny kooperaciski projekt z towarstwom Serbska murja, kotryž měri so předewšěm na młody serbski publikum. Pod hesłom „Mudrišo z Maćicu“ je mjeztym 14 přinoškow na platformje Instagram přistupnych. Wotpowědny kanal sćěhuje wjace hač 1 000 zajimcow. Tam wozjewjene, „na jakne a časo žortne wašnje serbske stawizny a wosobiny wobjednawace wideja“ je sej přerěznje něhdźe 3 500 ludźi wobhladało.