„Please, look at me ..." klinčeše kónc ­tydźenja na zwučowanskej žurli Serbskeho ludoweho ansambla. Tam běše znaty modowy fotograf Mario Testino z hosćom, kiž bě sej z Londona do Budyšina dojěł.

Budyšin (SN/hn/jp). Mario Testino je po słowach nowiny Die Zeit najznaćiši modowy fotograf swěta. Z tym knježeše w Serbskej kulturnej informaciji (SKI) wulka napjatosć, jako tam kónc februara njejapcy asistent fotografa zazwoni. Při telefonje wón zdźěli, zo chce fotograf hnydom spočatk měrca do Łužicy přijěć a fota Serbow zhotowić. Fotograf tči runje wosrjedź projekta, z kotrymž pokaza swět a jeho mjeńšiny kaž tež etniske skupiny. Hižo 19 lět dołho slědźi za skupinami, kotrež maja swójsku drastu a sej ju tež waža. Běše hižo w krajach wot Mongolskeje do Mexika po puću a hromadźeše wobrazy za swoju galeriju, kotruž pokazuje tuchwilu w Plazzo Bonaparte w Romje.