Mjezynarodny festiwal dudakow w Slepom generacije zwjazuje

Slepo (AK/SN). Wjace hač 300 wšelakich družinow dudow po cyłym swěće eksistuje. Tradiciju wosebiteje hudźby z dudami ludźo we wšelakich kónčinach swěta hač do dźensnišeho pěstuja. W Slepjanskej wosadźe je tomu tohorunja tak. „Slepjanski region je najmjeńši region z dudami po cyłym Zwjazku“, Wolfgang Kotissek podšmórny. Wón mjeztym hižo 10. fes­tiwal dudakow wot 19. junija do 21. junija w Slepom sobu organizuje. Domowinska župa Jakub Lorenc-Zalěski je hłownje za festiwal zamołwita. Krajny rada Zhorjelskeho wokrjesa dr. Stephan Meyer (CDU) zarjadowanja jako patron přewodźa. Wjace hač 200 akterow z wosom skupinow z Němskeje, Pólskeje, Čěskeje, Bołharskeje a Marokka lětsa sobu skutkuje. Loni w lěću su zamołwići přihoty za to zahajili.

„Nam dźe wo připóznaće instrumenta dudy. Naš Slepjanski region móže na tutu hudźbnu tradiciju jara hordy być“, Wolfgang Kotissek wuzběhny. „Nadźijam so, zo w přichodźe zaso wjace dźěći nawuknje, na dudach hudźić a zo je starši k tomu pohonjuja.“