Grodk (NC/JFK). Bjezdwěla wosebity wjeršk programa „Moja wěc je, kajkuž popadnu“ lětušeje Lausitziady běše sonet Miny Witkojc „Mjatel“, kotryž je Kati Sprigodojc we wobłuku premjery eksperimentelneje performance k elektroniskej hudźbje DJjoweho duwa Mystica (Anika Kruse a Meike Grabinski) recitowała. Dalšej na tymle projekće wobdźělenaj hudźbnikaj běštaj Paul Geigerzähler a Jakub Gruhl kaž tež rěčna poradźowarka Christiana Piniekowa. Nimo toho rysowaše ilustratorka Antje Rohter runočasnje k hudźbje, čemuž publikum z pomocu projekcijow sćěhowaše. Mjez dalšimi přinoškami běchu wustup serbskeje dźěćaceje rejwanskeje skupiny Delnjoserbskeje akademije, input wo tradiciji módroćišća wot Daniela Häfnera a prezentacija wurězkow krótkofilmow Maje Nagloweje a Juliusa Günzela. Wo přidatne serbske zynki na jewišću postarachu so STOI, Kula Bula a Choćebuski chór korčmarjow. Zaměr projekta, portret Łužicy ze swójskeje perspektiwy publikumej zbližić, je so z kaleidoskopom hudźby, literatury, reje a tworjaceho wuměłstwa na kóždy pad docpěł.