Nowy zwjazkowy sejm so zešoł
Zapósłancy prezidij parlamenta wuzwolili – Gregor Gysi zeńdźenje zahajił
Berlin (dpa/SN). Třiceći dnjow po wólbach je so nowy zwjazkowy sejm dźensa k swojemu prěnjemu posedźenju zešoł. Z tym zahaji so 21. legislaturna doba sejma. Zahajił je konstituowace posedźenje starobny prezident, zapósłanc Lěwicy Gregor Gysi. Wón je zapósłanc z najdlěšim słužbnym časom w sejmje. Hač do lěta 2017 bě starobny prezident stajnje najstarši zapósłanc sejma.
W swojej narěči Gysi zapósłancow namołwješe, swojej zamołwitosći wotpowědować a politiske debaty wěcownje a na runinje mjezsobneho respekta wjesć. Bjezposrědnje po tym wuzwolichu zapósłancy nowu prezidentku zwjazkoweho sejma. Dotalnu prezidentku, socialdemokratku Bärbel Bas (SPD), naslěduje bywša zwjazkowa ministerka za ratarstwo Julia Klöckner (CDU). Tradicionalnje ma najsylniša frakcija sejma prawo, tute zastojnstwo wobsadźić, kotrež je protokolarisce druhe najwažniše w zwjazkowym sejmje.
Bazar je zahajeny
Předstajeja jutrowne nałožki
Dźěra we Łobju dalše dźěła haći
Drježdźany (dpa/SN). Hłubokeje dźěry we Łobju dla so přihoty za wottorhanje Carolineho mosta w Drježdźanach dlija. Tak mjenowany kolk – přirunujomny z hłubokej dźěru na dróze – su minjeny tydźeń našli. Dźěra je tři do štyri metry hłuboka, Simone Prüfer, nawodnica měšćanskeho zarjada za dróhotwar, zdźěla. Runje na tutym městnje su róšty stajić chcyli, kotrež maja hišće stejacy dźěl mosta při dalšich dźěłach stabilizować.
Poprawom chcychu róšty tutón tydźeń natwarić. Město toho dyrbja nětko najprjedy kolk zasypać a ze železnej konstrukciju zakryć. Přichodny tydźeń dalšu pomocnu konstrukciju natwarja. Za to trěbne pontonowe dźěle su mjeztym z Čěskeje přiwjezli a na staroměšćanskim dźělu Łobja přiwjazali. Elementy słuža róštam jako fundament.
Najebać nowe problemy twarske dźěła wokomiknje hišće časowemu planej wotpowěduja, Prüfer rjekny. Hłowny zaměr, kónc meje srjedźny dźěl mosta wuzběhnyć, njeje wohroženy. Planowane je, srjedźny dźěl mosta na pobrjóh dowjezć a tam rozkuskować.
To a tamne (25.03.25)
Na wšěch 15 000 eurow je žona w spěšniku ICE ducy z Hannovera do Mnichowa namakała. 33lětna přizjewi so na to pola zwjazkoweje policije. Pjenjezy ležachu w tobole na prózdnym sedle w ćahu. Žona tošu policistam přepoda, kotřiž pjenjezy přeličichu. Dotal njeje so nichtó jako wobsedźer pjenjez přizjewił. Žona ma prawo na namakanske myto. Najprjedy raz pak policija pjenjezy wobchowa.
Pjany pasažěr je na lětanišću w Bremenje zapozdźenje wotlěta mašiny na kupu Mallorca zawinował. Jako pilot lětadło hižo na wotlět přihotowaše, sobudźěłaćerjam pjany muž napadny. 53lětny so přikazam stewardesow spjećowaše a jim dosć agresiwnje nadawaše. Pilot swoje přihoty na to přetorhny a muža z lětadła wupokaza. Mašina z dowolnikami móžeše hakle z 45 mjeńšinami zapozdźenja do směra na Španisku wotlećeć.
Přeńdźenja cyrkwje wodać
Rom/Mainz (B/SN). W Swjatym lěće 2000 prošeše bamž Jan Pawoł II. w Pětrowej cyrkwi w Romje na historiske wašnje wo wodaće přeńdźenjow cyrkwje. Israelski rozhłós rozprawješe tehdy wo historiskim mězniku poćahow mjez židami a křesćanami. Medije a zjawnosć su wuznaće na Božej mši wysoko hódnoćili. Do toho bu cyrkej stajnje jako „swjata, dospołna a perfektna“ předstajana.
Dušepastyrstwo we wójsku
Berlin (B/SN). Zamołwita za wójsko w Němskim zwjazkowym sejmje Eva Högl je w lětnej rozprawje 2024 wažnosć dušepastyrstwa wuzběhnyła. Wona so za „angažowane dźěło wšěm zamołwitym ewangelskeho, katolskeho a židowskeho dušepastyrstwa“ wuraznje dźakuje. Zawjazanosć dušepastyrjow k mjelčenju je 75 procentam wojakow wažna zepěra. Zastaranje hišće 3 000 muslimskich wojakow njespokoja.
Wuslědki prawje hódnoćić
Lukáš Novosad dale na čole čěskich přećelow Serbow
W Serbskim seminarje w Praze je so sobotu hłowna zhromadźizna Towarstwa přećelow Serbow (SPL) wotměła. Po dwěmaj lětomaj bu zaso nowe předsydstwo wuzwolene. Změny njejsu wulke. Stary předsyda Lukáš Novosad sta so z nowym, městopředsydka wostanje Eliška Oberhelová. Jimaj přidružichu so Iva Drmlová, Ondřej Šrámek, Antonin Kříž, František Krejčí a Kryštof Peršín, kotryž je jenički nowy čłon předsydstwa. Hłowna tema diskusije běchu wužadanja, z kotrymiž so towarstwo hižo dlěši čas bědźi: pobrachowacy dorost a financielne ćeže w zwisku ze stupacymi kóštami za tepjenje. Kóštow dla njeje wěste, hač budźe towarstwo Serbski seminar, kiž słuša čěskemu kultusowemu ministerstwu, dale wužiwać směć. Najebać to so prócuje, zo by styki do Łužicy wudźeržowało. Wo tym swědči tójšto zarjadowanjow, kotrež je towarstwo loni zorganizowało.
Znowa protesty w Turkowskej
Istanbul (dpa/SN). W Turkowskej su po wotsadźenju a zajeću Istanbulskeho měšćanosty Ekrema Imamoğla znowa statysacy ludźi na dróhu šli. W Istanbulu zhromadźichu so demonstranća před měšćanskim zarjadnistwom, najebać wobstejaceho zakaza demonstracijow w milionowej metropole. Wčera běchu Imamoğla do přepytowanskeje jatby tyknyli a jako měšćanostu „nachwilnje“ wotsadźili. Najebać to je jeho strona CHP za prezidentskeho kandidata wuzwoliła.
Planuja přesydlenje z Gazy
Tel Aviv (dpa/SN). Israel planuje nowe zarjadnistwo za „dobrowólne“ wupućowanje Palestinjanow z Gazaskeho pasma. Zaměstnić chcedźa wotrjad w zakitowanskim ministerstwje. Wón ma „dobrowólne wupućowanje wobydlerjow Gazaskeho pasma do druhich krajow po wěstych a kontrolowanych pućach přihotować“, medije rozprawjeja. Jordaniska přećiwo planam protestuje, dokelž z tym liči, zo hišće wjace Palestinjanow přińdźe.
Masowe protesty w Israelu
