Tradicija so pozhubja
To a tamne (25.11.24)
Wulět 13lětneje z awtom kubłarki z domu młodźinskeje pomocy w Porynsko-Pfalcy je so bjez škody skónčił. Jězdźidło, w kotrymž bě młodostna hišće dweju hólcow w starobje wosom a jědnaće lět sobu wzała, wosta z techniskej panu na dróze stejo. Swědkej awto „z třomi dźěćimi“ napadny. Policisća dowjezechu wobsadku zaso do dźěćaceho domu. Klučik awta bě 13lětna z kabata kubłarki wzała.
Wopiteho šofera nakładneho awta ze strašnej maćiznu je policija we wuchodnej Sakskej lepiła. Nakładne awto bě zastojnikam w tunlu pod Limasom napadnyło, dokelž tam z tutym strašnym wjezwom poprawom scyła jěć njesmědźeše. Při kontroli policisća pola 43lětneho šofera wóń alkohola zwěsćichu. Test wunjese 1,44 promilow. Muž njesmědźeše dale jěć. Jemu hroža konsekwency, dokelž je jemu alkohol dospołnje zakazany.
Podpěruja „100 000 Serbow“
Domowina na přijeću za wulku wiziju wabiła a załožbowa rada so zešła
Lubin (SN/mb). Sven Herzberger, bjezstronski krajny rada wokrjesa Dubja-Błóta, dźakowaše so Domowinje za „wulkotnu inscenaciju, kaž na mjezynarodnym filmowym festiwalu w Cannes“. Jeho a sto dalšich hosći witaše wobkuzłaca iluminacija do Lubinskeho hrodu. Tam je třěšny zwjazk prěni raz swoje přijeće za zastupjerjow politiki a towaršnosće z cyłeje Łužicy přewjedł. Přišli su nimo partnerow Serbow ze zwjazkoweho knježerstwa a parlamentow tež komunalni politikarjo kaž Antje Bobcyna, druha zastupowaca wjesnjanostka Worklec. Jim je předsyda Domowiny Dawid Statnik pod hesłom „Z wiziju do přichoda – zhromadnje za Serbstwo“ zaměr narodneje organizacije spřistupnił: w lěće 2100 zaso sto tysac serbowacych ludźi. „A za to Was jako partnerow trjebamy“, wón praji.
Reforma chorownjow w radźe
Berlin (dpa/SN). Zwjazkowa rada chcyše dźensa wo přesadźenju wjele diskutowaneje reformy chorownjow rozsudźić. Formelnje njetrjeba zastupnistwo krajow zakonjej přihłosować. Zwjazkowa rada pak móhła jón posrědkowanskej radźe parlamenta dale pósłać. Z reformu ministra za strowotnistwo Karla Lauterbacha (SPD) chcedźa chorownjam pjenježny ćišć wzać. W tym zwisku je braniborski ministerski prezident Dietmar Woidke (SPD) dźensa strowotnisku ministerku Ursulu Nonnemacher (Zeleni) pušćił.
Trump z nowej kandidatku
Washington (dpa/SN). Přichodny prezident USA Donald Trump je po cofnjenju Matta Gaetza bywšu statnu rěčnicu za nowu justicnu ministerku powołał. Pam Bondi bě 20 lět statna rěčnica. Trump chcyše poprawom Matta Gaetza za justicneho ministra měć. Tón pak nima žane juristiske znajomosće a je nimo toho z wumjetowanjemi konfrontowany, zo měješe splažne styki z njepołnolětnymi.
Awstralska wobmjezuje přistup
Rjadna knježna fotografuje, kak na Pětrowym naměsće w Romje ...
Postajenje korony dla njezakonske
Nowa koalicija w Durinskej
Wukazuja zajeće Netanjahuwa
Ruska hrozy z dalšimi raketami
Moskwa (dpa/SN). Ruska hrozy po prěnim zasadźenju noweje rakety srjedźneje zdalenosće z dalšimi wojerskimi dyrami přećiwo Ukrainje a jeje zapadnym podpěraćelam. „Bjerjemy sej prawo, swoje brónje přećiwo wojerskim objektam tych krajow zasadźeć, kotrež dowoleja, zo jich brónje přećiwo objektam pola nas wužiwaja“, rjekny ruski prezident Wladimir Putin. „W padźe eskalacije agresiwnych akcijow reagujemy na samsne wašnje.“ Po jeho informacijach je wčera rano nowa ruska raketa srjedźneje zdalenosće ukrainske wulkoměsto Dnipro trjechiła. Tam je šěsć rozbuchadłow do města zrazyło, kotrež pak njeběchu atomarne. Do toho je Ruska USA informowała, zo tajku raketu zasadźi.
Po tym, zo je Ruska swoju atomowu strategiju změniła, připowědźa tež USA nowu doktrinu. We Washingtonje pokazuja mjez druhim na polěpšene nuklearne kmanosće Chiny a Ruskeje. Skutkowne wottrašenje ze stron USA žada sej nowu strategiju, rěčnik zdźěli. Tuchwilne zasady USA pochadźeja z lěta 2022.
Debata kanclera dla skónčena
Boris Pistorius nochce kandidować – Olafa Scholza póndźelu wuzwola
Berlin (dpa/SN). W přewšo wobćežnym połoženju hotuje so SPD ze zwjazkowym kanclerom Olafom Scholzom na čole na wólbny bój k wólbam zwjazkoweho sejma. Po tym zo je zakitowanski minister Boris Pistorius oficialnje zdźělił, zo nochce so z kanclerskim kandidatom socialdemokratow stać, chce předsydstwo strony nawodu zwrěšćeneje amploweje koalicije za kanclerskeho kandidata nastajić. Přichodne tři měsacy dyrbi Scholz po tuchwilnych woprašowanjach něhdźe 15 do 20 procentow přećiwo nawjedowacej uniji CDU/CSU nachwatać.
Minjeny čas je SPD wobćežnu debatu wo tym dožiwiła, hač njeby Boris Pistorius na kóncu tola lěpši kanclerski kandidat był. Wón je we woprašowanjach z wotstawkom najwoblubowaniši politikar Němskeje. Dale a wjace politikarjow na komunalnej, krajnej a zwjazkowej runinje bě so za njeho wuprajiło.
