Serbja w Braniborskej maja swójski wólbny bój – wo serbsku radu. Tam wabi dr. Hartmut Leipner, sam kandidat a městopředsyda Domowiny, za to, serbskej radźe móc dać, sama rozsudźeć: To by kulturna a kubłanska awtonomija była. W Sakskej so Domowina hižo wjac hač lětdźesatk z mjeztym 32 lět starym postajenjom ­kultusoweho ministerstwa za serbske šulstwo bědźi. Kelko lět chcemy hišće wo trěbnu reformu prosyć? Delegaća zašłeje hłowneje zhromadźizny su wjac energije do toho inwestowali, žadanje za kubłanskej awtonomiju zabić, hač sej přemyslować, kak so z wěčneho modusa prošenja wudra­pamy. Tróšku swójskeho wólbneho boja by Serbstwu w Sakskej tyło. Bychu-li tež tu direktne wólby byli, by lud na přikład sam rozsudźił, hač měł dotalny předsyda serbskeje rady Marko Suchy dale gremijej přisłušeć. Wón je radźe sylnišu poziciju ze swójskej jednaćelnju wuwojował. To pak na wólbach w zwjazkowym předsydstwje njedosahaše. Marcel Brauman

Mnichow (dpa/SN). Hladajo na špatne hospodarske połoženje njewidźi předsyda bayerskeje CSU za cyłoněmsku jězdźenku žadyn přichod. „Njemóžu sej předstajić, zo financujemy měsačnje jězdźenku za 49 eurow, zo móhli ludźo jónu wob lěto na přikład do Bayerskeje jěć. Dołhodobnje to wjace njepóńdźe“, rjekny bayerski ministerski prezident w Mnichowje. Söder na to pokaza, zo je jězdźenka w přichodźe dospołnje wot připłatkow Zwjazka w Berlinje wotwisna. „Hdyž Zwjazk tole wjace njepłaći, nje­změje jězdźenka přichod. Cyle jednorje“, wón rjekny. Po wólbach zwjazkoweho sejma měło nowe knježerstwo pruwować, hač je financowanje „w cyłkownej zamołwitosći Zwjazka“ scyła hišće móžne. Söder sej žada, pjenjezy město toho do infrastruktury inwestować a tak tež Bayerskej pomhać.

Po měnjenju Södera inwestuje Němska přewjele do jězdźenki a přemało do wutwara infrastruktury. „Kolije, wobchad, mosty a bydlenja bychu wjac pjenjez derje znjesli“, wón praji. Jeničce Bayersku płaći cyłoněmska jězdźenka 400 milionow eurow wob lěto.

Poslednje wohrěwace słónčne pruhi wužiwali su ludźo minjeny tydźeń w Choćebuzu. Na měšćanskej promenadźe přeprošuje tomu nětko šěsć nowych ławkow. Přechodne to rozrisanje na płoninje, za kotruž pytaja w měšćanskej přiradźe za wuwiće hišće najlěpše móžnosće dalšeho wužiwanja. Nawisowacy konopej je z drjewa ro­binje twarjeny, 2,20 metrow dołhi a 1,90 metrow šěroki. Pjenjezy za ławki su ze zwjazkoweho spěchowanskeho fondsa za do přichoda kmane nutřkowne města kaž tež z měšćanskich srědkow. Dotal financowachu 44 projektow na dobro nutřkowneho města, dalše maja sćěhować. Woprawdźe přijomne pak budźe na swojoraznych ławkach drje hakle zaso w nalěću. Foto: Michael Helbig

Drježdźany (dpa/SN). 2 300 přidatnych městnow na parkowanišćach a specielna linija tramwajki budu nadróžny wobchad w adwenće w Drježdźanach po sypnjenju Carolineho mosta sobu zmištrować. Tole je měšćanosta za wobchad sakskeje stolicy Stephan Kühn (Zeleni) wčera při předstajenju noweho wobchadneho koncepta připowědźił. Z Carolinym mostom je centralna a wukonita wobchadna wóska wotpadnyła. Tuž dyrbjachu w měsće za nowymi móžnosćemi pytać. W nadróžnym bliskowobchadźe zwyši so w dohodownym času ličba sobujěducych wo 120 000 na cyłkownje 730 000 ludźi wob dźeń. Ličba wopytowarjow, kotřiž z awtom přijědu, wo 20 procentow rozrosće.

Ludźo njech po móžnosći zjawny ­bliskowobchad wužiwaja, to wobchadny koncept praji. Přidatnje wutworjenych 2 300 parkowanišćow je zwjetša darmotnych. 1 200 městnow steji njedaloko wikow k dispo­ziciji. Wot tam jědźe tram­wajka. Busy smědźa pod Marijinym mos­tom stać. Hodowny cirkus je so lětsa na druhe městno přepołožił. Tuž nastanje tež tam přidatnje 130 městnow za parkowanje busow.