Nowy generalny sekretar CDU
Berlin (dpa/SN). Dospołnje njewočakowano je předsyda CDU Friedrich Merz hladajo na špatne wuslědki woprašowanjow strony pod 30 procentami hišće do dowoloweje přestawki generalneho sekretara strony wuměnił. Hakle połdra lět w tutym zastojnstwje skutkowacy Mario Czaja dyrbi wotstupić. Z naslědnikom ma so hospodarski fachowc Carsten Linnemann stać. Merz chcyše jeho hišće dźensa stronje na poslednich wuradźowanjach do dowoloweje přestawki namjetować.
CDU bě wčera wječor překwapjejo zdźěliła, zo staj so Merz a Czaja „dowěrliwje na to dorozumiłoj, swoje zhromadne dźěło na čole strony skónčić“. Rozsud njeje jemu lochki był, Merz přizna. „Mario Czaja a ja znajemoj so wjele lět a wažu sej jeho jara. Na tym so tež po tutym personelnym rozsudźe ničo njezměni.“ Czaja ma tež přichodnje wažnu rólu w zwjazkowej politice přewzać.
Potrjechenych zapřijeć
Wěcy z muzeja NDR přesadźowali
Tři štwórćiny njespokojom
Berlin (dpa/SN). Po najnowšim woprašowanju su tři třećiny ludźi w Němskej njespokojom z dźěłom zwjazkoweho knježerstwa. 77 procentow woprašanych rjekny, zo su skerje abo jara njespokojom z knježerstwom. W februaru wučinješe tónle podźěl hišće 64 procentow. Tole wuchadźa z wčera wozjewjeneho trendoweho barometra sćelaka RTL. Tež mjez přiwisnikami třoch knježerstwowych stron (SPD: 52 procentow, Zeleni: 55 procentow a FDP: 71 procentow) je wjetšina woprašanych samsneho měnjenja. Jenož 22 procentow ludźi bě z dźěłom amploweje koalicije spokojom.
Narěčani na zadźerženje „tepjenskeho zakonja“ přez zwjazkowe wustawowe sudnistwo je sej wjetšina ludźi wěsta, zo dźěła knježerstwo chaotisce. 61 procentow ludźi podpěruje měnjenje, zo zasahnjenje sudnistwa dopokazuje, zo knježi amplowa koalicija njeprofesionalnje a chaotisce. 35 procentow woprašanych ma tute měnjenje za přehnate. SPD, Zeleni a FDP běchu so měsacy dołho wo zakonju wadźili a chcychu jón minjeny pjatk wobzamknyć. Sudnistwo w Karlsruhe je pak tomu zadźěwało.
To a tamne (12.07.23)
Wusnjeneho šulerja w busu zabyli su po rjadowaniskim wulěće we Wulkej Britaniskej. Dźěći běchu wječor po koncerće po puću do hotela na kromje Londona. „Bohužel je dźěćo, kiž bě sej na dompuću w busu wusnyło, w zamknjenym busu wostało“, nošer šule w jendźelskim Poole zdźěla. Šuler chce po dorěči ze staršimaj z wulětom pokročować. Pad chcedźa přepytować, zo njeby so wospjetował.
Z gumijowej palmu pod pažu je muž w Nižozemskej policiji napadnył. Při kontroli 34lětneho so spěšnje wukopa, zo bě muž dekoracisku palmu na bičwolejbulowym turněrje pokradnył. Po tym zo běchu palmu zarjadowarjam turněra wróćili, zastojnicy personalije muža přepruwowachu. Woni zwěsćichu, zo dyrbi paduch w Belgiskej hišće 18 lět jastwa wotsedźeć, dokelž bě někoho morił. Na to dowjezechu do Belgiskeje do jastwa.
Israel dźěl reformy schwalił
Tel Aviv (dpa/SN). Najebać masiwne protesty je israelski parlament prěni naćisk zakonja wjele diskutowaneje justicneje reformy schwalił. 64 z cyłkownje 120 zapósłancow hłosowaše po hodźiny trajacej diskusiji za zakoń, kiž ma móžnosće skutkowanja najwyšeho sudnistwa w kraju wobmjezować. 56 hłosowachu přećiwo tomu. Naćisk předwidźi, zo njesmě sudnistwo rozsudy knježerstwa abo jednotliwych ministrow přichodnje wjace jako „njepřiměrjene“ hódnoćić.
Sesselmann test wobstał
Weimar (dpa/SN). Po přepruwowanju swojeje swěry k wustawje smě politikar AfD Robert Sesselmann krajny rada w juhodurinskim wokrjesu Sonneberg wostać. Pola Sesselmanna nimaja „žanych pokazkow, kiž móhli starosć zbudźić, zo njeje wón wustawje swěrny a zo njeje tuž kmany, swoje nadawki jako krajny rada spjelnić“, zdźěli durinski krajny zarjadniski hamt. Sesselmanna běchu w juniju za prěnjeho krajneho radu AfD wuzwolili.
Wobara so zawrjenjam
Dowolowa sezona wabi tež lětsa zaso turistow ze wšeho swěta do ...
60 000 mortwych horcoty dla
Barcelona (dpa/SN). Wjace hač 60 000 ludźi je po najnowšich wobličenjach w lěću 2022 w Europje na sćěhi horcoty zemrěło – w dotal najhorcyšim lěću po zahajenju zapisowanja wjedra. Němska zaběraše ze 8 173 mortwymi třeće městno, po Italskej (18 010 mortwych) a Španiskej (11 324 mortwych). Tole rozprawja skupina slědźerjow fachoweho magacina Nature Medicine. Hladajo na ličbu wobydlerjow bě w Němskej 98 mortwych horcoty dla na milion wobydlerjow.
Slědźerjo Barcelonskeho instituta Institute for Global Health běchu ličby přez analyzu datow a z kompjuterowymi modelemi wuličili. Njeje lochko zwěsćić, hač je něchtó woprawdźe na sćěhi horcoty zemrěł, dokelž lěkarjo tole jenož zrědka takle direktnje dokumentuja. Tohodla su slědźerjo na ličby w přirunowanju horcych a mjenje horcych lět pokazani.
Fachowcy su so w swojich přepytowanjach na wulki skład datow zepěrali: Na wjace hač 45 milionow smjertnych padow mjez januarom 2015 a nowembrom 2022 ze 823 wšelakich regionow, kotrež reprezentuja 543 milionow wobydlerjow Europy w 35 krajach. Daty pochadźeja wot Europskeho statistiskeho zarjada.
Reforma chorownjow dojednana
Berlin (dpa/SN). Po tydźenjach trajacej zwadźe su so zastupnicy Zwjazka a zwjazkowych krajow na zasady noweho wusměrjenja chorownjow w Němskej dorozumili. Wobdźělnicy móžachu so na nadrobnosće reformy dojednać, zdźěli minister za strowotnistwo Karl Lauterbach (SPD) po zhromadnym wuradźowanju w Berlinje. Reforma je „tajke něšto kaž rewolucija“, wón rjekny. Chorownje njejsu hižo nuzowane, „telko nadźěłać kaž móžno“. Garantować chcedźa lěpšu kwalitu lěkowanja a transparencu wukonow.
Předsyda konferency strowotniskich ministrow Manne Lucha (Zeleni) z Badensko-Württembergskeje ma zasadu „na prawym městnje prawy poskitk“ za najlěpšu, dokelž zadźěwa wona „přěhračkam“ mjez chorownjemi. Dwaj krajej njejstej směrnicam přihłosowałoj: Bayerska hłosowaše z „ně“, Schleswigsko-Holsteinska je so hłosa wzdała. Z rjadowanjom chcedźa zapłaćenje chorownjow změnić a nadawki klinikow rozdźělić. W tym zwisku maja so kriterije kwality lěkowanja znowa definować.
Moskwa hrozy z reakcijemi
Wjerškowe zetkanje NATO we Vilniusu rěči tež wo přiwzaću Ukrainy
Moskwa (dpa/SN). Ruska je z napřećiwnymi naprawami hrozyła, dyrbjała-li NATO Ukrainu jako čłona přiwzać. Přistup Ukrainy by „jara negatiwne sćěhi za tak a tak hižo poł zničenu wěstotnu architekturu Europy měł a by Rusku wohrozył“, zdźěli rěčnik Krjemla Dmitrij Pjeskow wčera w Moskwje ruskim powěsćernjam. Tajka kročel by sej wot ruskeje strony „jara raznu a zrozumliwu reakciju“ žadała, Pjeskow doda.
Krjeml wě, zo do wjerška NATO dźensa a jutře we Vilniusu jara intensiwnje mjez čłonami NATO wo přistupje Ukrainy diskutuja a „zo je w tym zwisku dosć rozdźělnych měnjenjow“. „Kijewski režim“ spyta ze wšelakimi srědkami, „ćišć na wšitkich wobdźělenych wukonjeć, zo bychu w tymle prašenju swoju solidaritu demonstrowali“.
Na wjerškowym zetkanju nochce 31 čłonskich krajow NATO po informacijach němskich knježerstwowych kruhow Ukrainje žane přeprošenje za zastup do zakitowanskeje aliancy wuprajić. Za přeprošenje a konkretne kročele do směra na čłonstwo njeje hišće prawy wokomik, wčera w Berlinje rěkaše.
