Twarja internat za wučomnikow
Móst dróši hač planowany
Drježdźany (dpa/SN). Wottorhanje Carolineho mosta płaći saksku krajnu stolicu prawdźepodobnje 32 milionow eurow. To wuchadźa z wotmołwy měšćanskeho zarjadnistwa na prašenje frakcije Lěwicy w měšćanskej radźe. Z tym budu trochowane kóšty ze stron města porno dotal wozjewjenym ličbam wo tójšto wyše. Hišće kónc julija bě projektowa nawodnica za wottorhanje Grit Ernst z dróhotwarskeho zarjada krajneje stolicy kóšty wottorhanja na 18 milionow eurow trochowała.
Po informaciji měšćanskeho zarjadnistwa trjebaja jeničce za wotstronjenje wšitkich třoch jězdnjow mosta 27 milionow eurow. Dalše pjeć milionow su za wobchadne a wěstotne naprawy kaž tež za twarske přepytowanja mosta wudali. „Hdyž kóšty w krótkim času takle rozbuchnu, so prašam, kak realistiske dotalne planowanje města je“, praji André Schollbach z frakcije Lěwicy. Po jeho měnjenju su wuhlady za nowotwar mosta struchłe, „hdyž měšćanosta Dirk Hilbert (FDP) nětko hižo žadyn přehlad wjace nima“. Nowy móst ma po dotalnym planowanju 2031 hotowy być. Twarić móža drje jón najzašo w druhej połojcy 2028 započeć.
To a tamne (05.09.25)
Priwatna sušernja rybow je w delnjosakskim Norddeichu nad Sewjernym morjom zasadźenje wohnjoweje wobory zawinowała. Dowolnik bě za kerčiznu kur wuhladał a nuzowe čisło wolił. Wobsedźer domu so njemało dźiwaše, jako nadobo wohnjowi wobornicy w jeho zahrodźe stejachu. Bjez toho zo bychu porsćik hibnyli, za to pak z ćim wjetšim apetitom dyrbjachu ći zaso wotjěć. W sudobju wisace wuhorje njeběchu hišće dokurjene a „tak a tak za wšěch dosahali njebychu“.
Wólnočasni cowboyjojo schadźuja so tuchwilu na najwjetšich westernowych wikach Europy w Friedrichshafenje nad Bodamskim jězorom. Hač do njedźele wočakuja tam 50 000 wopytowarjow, kiž chcedźa so wónje konjow a kože nasrěbać. Wjace hač 300 wustajerjow ze 16 krajow prezentuje wšitko wot karěrowaneje košle hač ke kožanym škórnjam.
Telko serbskeho kaž hišće ženje
Dźeń Saksow je lěto wob lěto wulki wjeršk swobodneho stata. Na jubilejnym swjedźenju wočakuja organizatorojo lětsa sta tysacy wopytowarjow, najebać připowědźene měnjate wjedro.
Sebnica (SN/MG). Jubilejny 30. Dźeń Saksow, kotryž steji pod hesłom „Na kćějate dožiwjenja“, wotměje so kónc tydźenja při němsko-čěskej mjezy. Měsće Sebnica a Dolní Poustevna jón mjenujcy zhromadnje wuhotujetej. Organizatorjo liča z dohromady něhdźe 250 000 wopytowarkami a wopytowarjemi. Za cyły kónc tydźenja su pisany program přihotowali, kiž ma wšě móžne zajimy ludźi wotbłyšćować. Po cyłym měsće su organizatorojo 18 tematiskich milow zarjadowali. Tam wěnuja so najwšelakorišom aspektam zjawneho žiwjenja.
Koalicija zwólniwych so zešła
Paris (dpa/SN). Podpěraćelske kraje Ukrainy, kiž su w tak mjenowanej koaliciji zwólniwych zjednoćene, su dźensa w Parisu wo wěstotnych garantijach po přiměrje wuradźowali. Pod nawodom francoskeho prezidenta Emmanuela Macrona a britiskeho premierministra Keira Starmera su zastupnicy 30 krajow koncept dale wudospołnili, w Élyséejowym palasće zdźělichu. Zwjazkowy kancler Friedrich Merz (CDU) bě zeńdźenju we widejowej konferency přizamknjeny.
Nowe protesty w Israelu
Jerusalem (dpa/SN). Přiwuzni zawlečenych israelskich zastajencow w Gazaskim pasmje su sej před bydlenskim domom ministerskeho prezidenta Benjamina Netanjahuwa w Jerusalemje kónc Gazaskeje wójny a zrěčenje wo pušćenju zastajencow žadali. Wčera wobdźělichu so po informacijach policije dźesaćitysacy na wulkozarjadowanju. Netanjahu wumjetowaše demonstrantam, zo překroča čerwjenu liniju, hdyž dróhi blokuja a jemu „wšědnje ze smjerću hroža“.
Škitny status zběhnjeny
Wohnjowi wobornicy pytaja w powostankach historiskeje nadróžneje w ...
AfD jasnje najsylniša móc
Wojacy USA dale w Pólskej
Washington (dpa/SN). Wojacy USA maja tež přichodnje w Pólskej wostać. Tole je prezident USA Donald Trump nowemu pólskemu prezidentej Karolej Nawrockemu přilubił. „Njejsmy nihdy na to myslili, wojakow z Pólskeje wotwołać. W druhich krajach je tole hinak. Stejimy dale kruće za Pólskej a pomhamy jej so zakitować“, rjekny Trump na nastupnym wopyće Nawrockeho we Washingtonje. USA móhli wojersku prezencu hišće zwyšić, jeli sej Pólska tole přeje. Tuchwilu je nimale 10 000 wojakow USA w Pólskej.
Nawrocki rjekny, zo su Polacy „prěni króć w 20. a 21. lětstotku cuzych wojakow w swojim kraju dla zbožowni“. Ameriscy wojacy su „dźěl našeje towaršnosće“, pólski prezident podšmórny.
Ludźo njespokojom z knježerstwom
Berlin (dpa/SN). Wjetšina ludźi w Němskej je z dźěłom knježerstwa CDU/CSU a SPD njespokojom. To wuchadźa z najnowšeho woprašowanja sćelaka ARD. Jenož hišće 22 procentow woprašanych je z dźěłom knježerstwa zwjazkoweho kanclera Friedricha Merza (CDU) spokojom. 75 procentow rjekny, zo njeje spokojom. Aktualne knježerstwo je z tym hišće mjenje woblubowane hač swój čas amplowa koalicija. Zwjazk SPD, Zelenych a FDP bě po prěnich štyrjoch měsacach 47 procentow přihłosowanja docpěł.
Njespokojnosć ludźi potrjechi wobaj koaliciskej partneraj. 68 proc. woprašanych je z dźěłom CDU/CSU njespokojom. Jenož 29 procentow je spokojom. Z dźěłom SPD je tohorunja jenož 29 procentow spokojom, 67 procentow scyła nic.
Podobnje špatnje posudźuja ludźo dźěło zwjazkoweho kanclera Friedricha Merza: Jenož třećina sej jeho dźěło chwali. 62 procentow je porno tomu njespokojom. Najwoblubowaniši je zakitowanski minister Boris Pistorius (SPD) ze 60 procentami přihłosowanja.
Söder: Depresiju přewinyć
Koaliciski wuběrk CDU/CSU a SPD so na zasady skutkowanja dojednał
Berlin (dpa/SN). Wjerškowe zetkanja z industriju a skutkowne socialne reformy maja po woli knježerstwoweje koalicije nazymu wuhibki za hospodarske wožiwjenje w Němskej stajić. Runočasnje přilubichu zwjazkowy kancler Friedrich Merz (CDU), předsyda CSU Markus Söder a předsydaj SPD Bärbel Bas a Lars Klingbeil po posedźenju koaliciskeho wuběrka w Berlinje, zo chcedźa přichodnje konstruktiwnišo jedyn z druhim wobchadźeć.
Hladajo na internu zwadu noweho knježerstwa prěnje sto dnjow přiznachu nawodźa CDU, CSU a SPD zmylki. Po słowach Södera chce so koalicija nětko „po lěćnej depresiji noweje nazymskeje mocy nasrěbać“. Lisćinu předewzaćow, kotruž běchu někotři wočakowali, pak politikarjo předpołožili njejsu.
