Njebjelčicy (SN). W zwisku z rozprawu w našim wječorniku minjeny štwórtk wo rozsudźe gmejnskich radźićelow, partnerske styki z gmejnomaj w Madźarskej a Beninje zakónčić, poda Njebjelčanski wjesnjanosta André Bulank znazornjace informacije. Mjez druhim skedźbnja wón na to, zo je so gmejna před finalnym wothłosowanjom kónc septembra pola towarstwow, zajimowych skupin a młodźinskich klubow naprašowała, „hač bychu zwólniwi byli, partnerstwo z madźarskej gmejnu Ladánybene abo z gmejnu Quidah w Beninje přewzać a samostatnje wudźeržować“. Cyłkownje běše 25 procentow naprašowanych wotmołwiło. Mjez štyrjomi wotmołwami, běchu tři wotprajenja a jedna z njejasnym wuprajenjom. „Wotmołwy wotbłyšćuja rozsud gmejnskeje rady, naposledk wotzamknjenej partnerskej zrěčeni w Madźarskej a Beninje rozpušćić“, piše André Bulank w swojej zdźělence na SN. Wón skedźbni na „sylny konsolidaciski ćišć, pod kotrymž gmejna Njebjelčicy steji“. Financna stabilita ma tohodla w přichodnych lětach wysoku prioritu w dźěle gmejny.

Marcel Brauman

Wosrjedź Drježdźan, w susodstwje kulojteho kina na Praskej dróze, je so zašłe lěta „arabska štwórć“ etablěrowała. Z wotpowědnymi hosćencami a wobchodami. Tule móžeš strowe chłóšćenki za přihó­dnu płaćiznu nakupować, a tež swójby z małymi dźěćimi njetrjebaja so bojeć, zo harowace pintlaški wulkim ludźom na čuwy du. Atmosfera je wotputana, kupcy, hosćo a tu bydlacy su jara wšelakeho pochada a tež žiwjenskeho wašnja.

Tudyši wobraz města so do aktualneje diskusije wo wuprajenju kanclera Merza hodźi, haj wšak, je tež poměrnje wjele žonow w islamskim rubišku, w hidźabje. Njesłušam do kruha ludźi, kotřiž maja tajki napohlad za wobohaćenje městow abo wuraz pisaneje towaršnosće. Wosebje w lěću, hdyž nimale kompletnje zababjene žony ze swojim połnahim mužom po měsće dundaja, spóznawaš zastarske potłóčowanje žonow. Přiwšěm pak tule tohorunja wjele žonow syriskeho po­chada nadeńdźeš, kotrež bjez hidźaba modernje a sebjewědomje wustupuja. A pinčnicy w hidźabu, kotrež rozwólnje z hosćimi-mužemi žortuja.

Wot spočatka měsaca skutkuje 38lětny Konječan Tomaš Korch w zastojnstwje społnomócnjeneho za serbske naležnosće na Budyskim krajnoradnym zarjedźe. Kak je so zažiwił a što je sej předewzał, wo tym je so Milan Pawlik z nim rozmołwjał.

Kak je k tomu dóšło, zo sće so na wupisane městno wokrjesneho społnomócnjeneho za serbske naležnosće požadał?

T. Korch: Sprawdu prajene běch so hižo před wjace hač dźesać lětami z tutej mysličku nosył. Wot lěta 2003 wšak na krajnoradnym zarjedźe dźěłam a předstawa, zo so na dźěle ze serbskimi temami zaběram, je so mi lubiła. Jako potom Regina Krawcowa městno přewza, sym ideju najprjedy raz spušćił. Hakle po tym, zo běše so jeje naslědnica Halena Jancyna jako serbska społnomócnjena ze zastojnstwa rozžohnowała, mi stare přeće zaso do mysli přińdźe. Jako městno internje wupisachu, sym so powabił.

Za to steji Wam 19,5 hodź. wob tydźeń k dispoziciji. Móžeće posudźować, hač tole za wšědne nadawki dosaha?

Změna wustawy: Wysokorjadny zastupjer mjeńšinowu radu přijał

Berlin (SN/mb). Je zwjazkowe knježerstwo zwólniwe, próstwu Zwjazkoweje rady spěšnje spjelnić a so wo přiwzaće štyrjoch domoródnych mjeńšin do zakładneho zakonja starać (SN su rozprawjeli)? Na to drje aktualna zdźělenka mjeńšinoweho sekretariata w nadawku mjeńšinoweje rady njewotmołwja. Ale je zajimawych indicow: Na wčerawšim wopyće zastupjerjow mjeńšin – mjez nimi běchu předsyda Domowiny Dawid Statik, jeho naměstnik Hartmut Leipner a hłowna jednaćelka třěšneho zwjazka Judit Šołćina – w nutřkownym ministerstwje Zwjazka běše Christoph de Vries (CDU) rozmołwny partner. Wón nutřkowneho ministra jako parlamentariski statny sekretar zastupuje a je za zwisk ze zwjazkowym sejmom zamołwity, kiž ma wo změnje wustawy rozsudźić.

Nimo njeho je so tež Hans-Leo Dirks, nawoda referata w ministerstwje a za narodne mjeńšiny zamołwity, na terminje wobdźělił. De Vries „zwurazni swoju sympatiju za naležnosće narodnych mjeńšin a hódnoćeše dźěło mjeńšinoweje rady“, so w zdźělence wjeselachu.