Konferenca narodnych mjeńšin a wusydlerjow so wotměła

Berlin (SN/MkWj). Konferenca pod hesłom „Domizna – identita – wěra“ wotmě so wčera w Berlinje. Na nju přeprosyłoj běštaj zwjazkowy nutřkowny minister dr. Thomas de Maizière (CDU) a społnomócnjeny zwjazkoweho knježerstwa za naležnosće wusydlerjow a narodnych mjeńšin Hartmut Koschyk (CSU). Přeprošeni běchu zastupjerjo wusydlerjow, wšitkich narodnych mjeńšin w Němskej kaž tež němskich mjeńšin we wukraju. Přichwatali běchu tež reprezentanća politiki, hospodarstwa, cyrkwjow, sporta a kultury. Serbow zastupowaše předsyda Domowiny Dawid Statnik. Zarjadowanje sobu organizowałoj běštej Judith Wałdźic z mjeńšinoweho sekretariata štyrjoch awtochtonych narodnych mjeńšin a ludowych skupin Němskeje a jeje sobudźěłaćerka Madlenka Kowarjec. Zarjadowanje wotmě so na wulkej konferencnej žurli zwjazkoweho ministerstwa za nutřkowne naležnosće. Serbski žurnalist Danko Handrik je moderěrowaše. Jemu poboku bě redaktorka hornjošleskeho němskorěčneho rozhłosoweho sćelaka w pólskim Raciborzu Anna Ronin.