Moskwa/Soči (dpa/SN). Ruska je Americe wumjetowała, zo Kurdow na sewjeru Syriskeje k separatizmej pohonja. „Hižo dyłho spytaja USA, Kurdow wot dialoga z knježerstwom w Damaskusu wotdźeržować“, rjekny ruski wonkowny minister Sergej Lawrow w Moskwje. Přikłady wón žane njemjenowaše. USA Kurdow w po­trjechenej kónčinje podpěruja.

Minjeny kónc tydźenja bě turkowska armeja ofensiwu přećiwo kurdiskej milicy YPG w Afrinje zahajiła. Rěčnik Krjemla Dmitrij Pjeskow rjekny, zo Ruska wuwiće dokładnje wobkedźbuje. Moskwa ma w tymle prašenju stajny zwisk z nawodnistwom w Ankarje a Damaskusu.

Lawrow potwjerdźi, zo so Kurdojo na­jebać konflikt z Turkowskej na přichodny kónc tydźenja planowanej konferency wobdźěla. Moskwa bě zastupjerjow Kurdow na konferencu do Sočija přeprosyła. „Róla Kurdow dyrbjała so w dalšim po­litiskim procesu w Syriskej zakótwić“, rjekny Pjeskow powěsćerni Tass.