Konferenca ludow Syriskeje w Sočiju nad Čornym morjom zahajena

Soči (dpa/SN). Najebać wojowanja na wjacorych frontach w Syriskej je so w dowolowym centrumje Sočiju nad Čornym morjom dźensa wot Ruskeje nastorčeny měrowy kongres zahajił. Moskwa chcyła docpěć, zo na „Kongresu ludow Syriskeje“ wšitke ludowe a nabožne skupiny kraja, hdźež howri wobydlerska wójna, wo powójnskim porjedźe wuradźuja. Sobuzarjadowarjej­ kongresa stej Iran a Turkowska.

Přiwšěm njebě hač do poslednjeho wokomika jasne, štó na konferencu přijědźe a štó nic. Opoziciski Syriski jednanski komitej (HNC) konferencu bojkotuje, protestujo přećiwo nastajenju syriskeho knježerstwa w paralelnje wotměwacym so Genfskim měrowym procesu pod nawodom Zjednoćenych narodow (UNO). Tak pobrachuje najwjetši zwjazk přećiwnikow mócnarja Bashara al-Assada.