Podstupim (dpa/SN). Braniborske krajne knježerstwo chce njetrjebawše ničenje žiwidłow wobmjezować. Hišće lětsa chcedźa tuž zwjazk přećiwo brojenju žiwidłow załožić. To zdźěli minister za škit přetrjebarjow Stefan Ludwig (Lěwica). Wón předstaji nowu přetrjebarskopolitisku strategiju, kotruž bě kabinet spočatk tydźenja wobzamknył.
Kóždy wobydler Němskeje wob lěto přerěznje 82 kilogramow žiwidłow do wotpadkow mjeta, rěka w předpołoženym dokumenće. Mjenowany zwjazk ma po planach knježerstwa producentow, wikowarjow, zapakowansku industriju a transportne předewzaća zapřijeć.