Hladaš-li za ludźimi, kotřiž su w bjezposrědnjej zašłosći Serbam šćedriwje z pomocu poboku stali, přińdźe kedźbliwemu Serbej mjeno Renate Harcke do mysli. Tehdy, w lěće 1990, jako so w Serbach na to hotowachu, nowy Serbski zakoń naćisnyć, pytaše komisija za wudźěłanje zakonja fachowcow. Do Budyšina přizjewi Wysoka šula za prawo a zarjadnistwo swoju nawodnicu katedry dr. Harcke jako ekspertku. Hižo na druhim wuradźowanju w měrcu bě docentka z Podstupima-Babelsberga přitomna w rozrisanju prawniskich naležnosćow serbskeho ludu, a wona zwosta hač do dźensnišeho zwjazana z mjeńšinowej politiku. Jutře, 28. decembra, woswjeći 65. narodniny.
Renate Harcke narodźi so 1954 w Calbe nad Solawu, złoži 1973 maturu a poda so w samsnym lěće do ruskeho Woronježa na studij prawniskeje wědomosće. Wróćiwši so bu młoda juristka asistentka, wyša asistentka a naposledk nawodnica katedry na Akademiji statnych a prawniskich wědomosćow. 1981 promowowaše na temu „Statne prawo w ZSSR“. Po politiskim přewróće bu Babelsbergske kubłanišćo juristow wotwite.
