Serbski sejm je na swojim posedźenju deklaraciju 12. junija wobzamknył. Serbske Nowiny wobsah dokumentuja:
Serbski sejm, swobodnje wuzwoleny parlament serbskeho ludu, zwěsća:
Něhdźe 1 500 lět wobsydla ze zapadosłowjanskich kmjenow zrosćeny lud našu domiznu. Tudy je naš zdawna zdźědźeny sydlenski kraj a naš žiwjenski zakład, kotryž naši prjedownicy wobdźěłachu, wobstarachu a za nas a našich potomnikow škitachu a zachowachu. Naš lud a naš sydlenski kraj bu wotwonka přez cuze mocy zdobyty. Přiwšěm smy sebi našu rěč a naše tradicije přez lětstotki zachowali. Mamy krutu wolu, swoju samostatnu identitu, kulturu a rěč wožiwić, zdźeržeć a dale wuwiwać. Chcemy to z nutřkownym samopostajowanjom kaž tež z mócnym soburozsudźowanjom zdokonjeć.
Za nas je cyle wěste, zo je serbski lud indigeny, awtochtony narod. K tomu so jasnje wuznawamy a wozjewjamy dospołne wužiwanje prawow, kotrež zwisuja z ILO-konwenciju 169, dojednanjom wo awtochtonych a w kmjenach žiwych ludach w njewotwisnych krajach, 1989, a z rezoluciju 61/295, deklaraciju Zjednoćenych narodow wo prawach indigenych ludow, 2007.
