Centrala noweho slědźenišća w Zhorjelcu dźěło zahajiła

Zhorjelc (SN/mb). Wulki wokomik to na Póstowym naměsće w Zhorjelcu wčera popołdnju: Bettina Stark-Watzinger (FDP), zwjazkowa ministerka za slědźenje, a sakski ministerski prezident Michael Kretschmer (CDU) přepodawataj designowanemu załoženskemu direktorej Astrocentruma Łužica (DZA), prof. Güntherej Hasingerej, symboliski kluč za nachwilne stejnišćo centrale tutoho wulkoslědźenišća. We Wojerowskej radnicy ma wone hižo nimale lěto swój běrow, blisko stejnišća planowaneho podzemskeho labora za wuslědźenje grawitaciskich žołmow. A w Konjecach su před lětomaj probowe točenja zahajili, kotrež su po měnjenju fachowcow wobkrućili: We łužiskim zornowcu knježi dosć „měra“ za „wusłuchanje“ kosmosa.