Koalicija CDU, SPD a FDP w Saksko-Anhaltskej za změnu na čole kraja

Magdeburg (dpa/SN). W Saksko-Anhaltskej su za dočasne wólby noweho ministerskeho prezidenta puć rubali. Krajne předsydstwa wšitkich třoch koaliciskich stronow CDU, SPD a FDP su wčera wječor tomu přihłosowali, zo krajny šef CDU Sven Schulze zastojnstwo ministerskeho prezidenta z rukow Reinera Haseloffa (CDU) přewozmje.

„Z našeje strony smy zelenu swěcu ­dali“, rjekny Schulze powěsćerni dpa. Wón chce krajne knježerstwo zhromadnje z SPD a FDP do lěta 2026 wjesć a krajej nowe perspektiwy skićić. Zamołwići chcedźa pokazać, zo wužadanja zhromadnje zmištruja. Nětko njesmě so wšitko jenož wo wólbny bój wjerćeć. Rozsudy su trěbne, tak Schulze.