Budyski wokrjes wužiwa hižo wot lěta 2007 zwjazkowy program „Demokratie leben“, zo by přećiwo prawicarskemu ekstremizmej a hidźe na čłowjeka aktiwnje stupił. To je derje tak. Tež wčerawša konferenca demokratije bě derje přihotowana. Referenća – historikar, kubłanska wědomostnica, měšćanosta – přinošowachu ze swojimi rozdźělnymi nazhonjenjemi a dopóznaćemi k tomu, rozšěrjacu so hidu na cuzeho a njedowěru do demokra­tije lěpje rozumić. Tež partnerojo-pomocnicy za móžne přichodne akcije stejachu k dispoziciji. Přiwšěm wostanje njespokojace začuće. Tak pobrachowachu wučerjo jako snano najwažniši mediatorojo ni­male dospołnje. „Njetrjebamy symbolisku alibi-politiku, ale dyrbymi demokratisce žiwi być“, žadaše sej referentka. Što zwostanje z konferency? Jenož za demokratiju wabjacy měšk, pisak a cedlowy blok je přemało­. Cordula Ratajczakowa

Najebać dosć pozitiwny rozsud wo sydlenskim rumje je wobmyslenjow

Choćebuz (SN/JaW). Zwjazkowe předsydstwo Domowiny je so minjeny pjatk w Choćebuskim delnjoserbskim internaće mjez druhim ze serbskim sydlenskim rumom w Braniborskej rozestajało.

Wobě noze złamał je sej paduch w Mecklenburgsko-Předpomorskej při ćěkańcy. Zhromadnje z kumpanomaj bě wón w twarskich wikach w Parchimje wěcy w hódnoće 60 eurow kradnył. Při­stajeni skupinu lepichu a dowjezechu ju do běrowa w prěnim poschodźe. Jedyn z muži tam z wokna skoči a so ćežko zrani.­ Tamneju přepodachu policiji. Zranjeneho dowjezechu do chorownje.

Něhdy za dźesać eurow na čaporowych wikach kupjeny, nětko za 750 000 eurow dale předaty: Londonski awkciski dom Sotheby’s je drohotny diamantny pjeršćeń za njewočakowano wulku sumu přesadźował. Muž bě před něšto časom pjeršćeń w awkciskim domje trochować dał. Při tym so wukopa, zo ma stary pjeršćeń­ z 80tych lět drohotny 26,92 karatowy­ diamant za 350 000 eurow. Sumu­ su nětko jasnje přetrjechili.

Wittenberg/Münster (B/SN). Ze swjatočnej Božej słužbu pod hołym njebjom z wjac hač 100 000 wěriwymi bu před tydźenjom we Wittenbergu Ewangelski cyrkwinski dźeń zakónčeny. Na jewišću steještej dwě požčonce: Wołtar a čitanski pult z masiwneho drjewa buštej hižo na mnohich Dnjach katolikow wužiwanej. Wobě cyrkwinskej wulkozarjadowani sej stajnje zaso mjezsobu pomhatej, rjekny jednaćel Dnja katolikow, Martin Strauch: „Je to rjane ekumeniske znamjo.“

Najdlěša biblija swěta