Merz a Scholz so zetkałoj
Berlin (dpa/SN). Zwjazkowy kancler Olaf Scholz (SPD) a nawoda frakcije CDU/CSU w zwjazkowym sejmje Friedrich Merz staj so dźensa w kanclerskim zarjedźe w Berlinje na rozmołwu zetkałoj. Hłowny nastork zetkanja bě smjertny nadpad w Solingenje, po kotrymž je pozdatny skućićel, 26lětny Syričan, w přepytowanskej jatbje. Njeskutk bě debatu wo migraciskej politice a wotsunjenju wožiwił. Wčera so wozjewi, zo chcetaj so Merz a Scholz tuteje naležnosće dla zetkać. Generalny sekretar CDU Carsten Linnemann bě w tym zwisku rjekł: „Nadźijam so, zo přewozmje kancler iniciatiwu a zo njepraji jeno to, štož hižo měsacy a lěta powěda“, potwjerdźi w rozhłosu. „Smy zwólniwi. Hdyž knježerstwo zwólniwe njeje, by to historiski zmylk był“, dale měni.
Merz žada sej dospołne zawrjenje mjezow Němskeje za ćěkancow ze Syriskeje a Afghanistana. Scholz tole wotpokazuje.
Spěchowanje wšěm přistupne
Kretschmer: Rozsudne wólby
Drježdźany (dpa/SN). Sakski ministerski prezident Michael Kretschmer, načolny kandidat CDU při wólbach Sakskeho krajneho sejma přichodnu njedźelu, 1. septembra, je ludźi namołwjał, demokratisku srjedźiznu sylnić. „To su rozsudne wólby, dźe wo wšitko“, rjekny wón na zarjadowanju w Drježdźanach. Hač je swobodny stat po wólbach „hišće tak stabilny“, rozsudźi so ze sylnosću unije. Poslednje dny do wólbow trjeba kraj rozmach, „zo bychmy hromadźe dźerželi“.
Na kóncu póńdźe wo „někotre hłosy“ a wo prašenje, štó je najsylniša móc w kraju. „Dyrbimy prěni być, zo bychmy nadawk dóstali, knježerstwo zestajeć a zo by tutón kraj woprawdźe dobry přichod měł“, Kretschmer rjekny. „Dźe wo Saksku. Su to naše wólby, kotrež rozsudźa wo našim přichodźe.“
Tež předsyda CDU Friedrich Merz a šef CSU Markus Söder wabještaj za Kretschmera. Wobaj potwjerdźištaj, zo je Kretschmer prawy muž na čole kraja. Sakska je sej hladajo na přirunowanje krajow wodźace městno wudobyła, tak Söder.
Zelenskyj připowědźa wjećbu
Po masiwnych nalětach Ruskeje na ukrainsku energijowu infrastrukturu
Kijew (dpa/SN). Ukrainski prezident Wolodymyr Zelenskyj je wjećbu za wobšěrne ruske wojerske nalěty na swój kraj připowědźił. Na tutej wotmołwje wobdźěla so tež wot zapada přewostajene wojerske lětadła typa F-16, rjekny Zelenskyj w swojim wčerawšim wječornym widejowym poselstwje. Ruska bě susodny kraj wčera po informacijach Kijewa w běhu krótkeho časa z 236 raketami a trutami atakowała. Nadpady měrjachu so předewšěm na energijowu infrastrukturu kraja.
Nalěty žadachu sej znajmjeńša sydom smjertnych woporow. Tež minjenu nóc knježeše w mnohich městach kraja powětrowy alarm. We wulkoměsće Krywyj Rih je raketa do hotela zrazyła a dwě wosobje moriła.
Zelenskyj pokaza w tym zwisku na mjeztym tři tydźenje trajacu ofensiwu w ruskej kónčinje wokoło Kurska. Ukrainske jednotki su tam kontrolu nad ruskim teritorijom rozšěrili a dalšich ruskich wojakow zajeli. Tole polěpšuje móžnosć wuměny wójnskich jatych, wón rjekny.
Kajka to překwapjenka
Pawoł Njek
Serbsko-němsko-galiciske dźiwadło
To a tamne (27.08.24)
Wosrjedź dróhi je wopita šoferka w Bremerhavenje swoje awto parkowała a je sej za to pomoc skazała. Pomocnik pak njebě tohorunja wjace strózby. Swědkojo běchu problemy žony při zaparkowanju wobkedźbowali a policiju wołali. Zastojnicy wobswědčichu žonje po tesće alkohola „dospołnu njekmanosć“ jězdźenja. Wona dyrbješe runje tak kaž jeje přewodnik sobu na policajsku stražu, zo bychu woběmaj krej brali.
Agresiwna kóčka je w Kielu swoju wobsedźerku nadběhowała. Žona dyrbješe so w stwě bydlenja zamknyć. Tež susodka njemóžeše njemdru kóčku změrować. Skónčnje wohnjowi wobornicy zhromadnje z policistami zwěrjo z pomocu popjerjoweho sprayja popadnychu a do zwěrjatownje dowjezechu. Čehodla bě so kóčka takle njewšědnje zadźeržała, dotal njewědźa. Nichtó so njezrani.
Za wjac zjawneje serbšćiny
Poskitk simultaneje techniki serwisoweho běrowa dotal lědma wužiwali
Wojerecy (SN/MiP). Mały jubilej pjećlětneho wobstaća serwisoweho běrowa za serbšćinu w komunalnych naležnosćach w awgusće je sobudźěłaćerka Franciska Grajcarekec nětko priwatnje hišće krónowała: ze serbskim kwasom w Radworju. Wšědny dźeń w běrowje na prěnim poschodźe domu Domowiny we Wojerecach pak njeznaje swjatočnosće, ale pilne wobdźěłanje dotal wjac hač 1 200 nadawkow. Dohromady 30 gmejnow je regularnje posłužby serwisoweho běrowa wužiwało. W času korona-pandemije je tež wjele přełožowarskich nadawkow ze stron krajnoradneho zarjada w Budyšinje dóšło. Tola Grajcarekec a jeje kolega Jan Kral njestarataj so jenož wo přełožki zarjadniskich tekstow a napisow. Wonaj gmejnam w serbskim sydlenskim rumje Sakskeje tež poradźowanje za zwoprawdźenje serbsko-němskeje dwurěčnosće poskićujetaj. A runja redakciji Serbskich Nowin wuwiwataj po potrjebje nowe słowa, tule za komunalnu politiku.
Debatuja zaso wo wotsunjenju
Smjertny islamistiski nadpad w Solingenje wubudźa diskusije
Solingen (dpa/SN). Po smjertnym nadpadźe z nožom w Solingenje jewja so razniše žadanja za krućišimi prawidłami wotsunjenja a noweho zakonja brónjow dla. Runočasnje žadaja sej wujasnjenje, čehodla su zamołwite zarjady loni na pospyće, syriskeho požadarja azyla wotsunyć, zwrěšćili. Jenož tohodla je mjenowany Syričan takle minjeny pjatk hakle krawny nadpad z třomi smjertnymi woporami skućić móhł.
Na nadróžnym swjedźenju w měsće w Bergiskim kraju bě skućićel dale wosom ludźi zranił, štyrjoch z nich ćežko. 26lětny podhladny sedźi wot soboty w přepytowanskej jatbje. Mjez druhim wumjetuja jemu čłonstwo w terorowej milicy islamski stat. Organizacija twjerdźi, zo je skućićel w jeje nadawku jednał. Wona rozšěri mjenujcy widejo, kotryž pječa atentatnika pokazuje. Hač je widejo woprawdźe awtentiske, njeje dotal jasne.
