Spahn razne kontrole zakituje
Wótra kritika Awstriskeje nowych namjeznych rjadowanjow dla
Berlin (dpa/SN). Zwjazkowy minister za strowotnistwo Jens Spahn (CDU) je razniše kontrole na mjezy k Čěskej a Awstriskej k wotwobaranju koronawirusa zakitował. „Dyrbimy wokrjesam podłu mjezy składnosć dać, k měrej přińć“, rjekny Spahn Stuttgartskim nowinarjam. Wón sam je šěsć kilometrow wot nižozemskeje mjezy zdaleny wotrostł a wě sej lěpšiny Europy bjez mjezow wažić. „Je pak wokomikow w tuchwilnej pandemiji, w kotrychž je trjeba na dobro wěstoty a strowoty wšěch rozsudźić.“
Na mjezy k Čěskej a awstriskemu zwjazkowemu krajej Tirol płaća wot wčerawšeho nowych mutacijow koronawirusa dla razniše postajenja při zapućowanju wobydlerjow z teju krajow. Z potrjechenych kónčin smědźa jenož hišće wosoby do Němskeje přijěć, kotrež maja tu bydlenje. Wuwzaća płaća za medicinski personal, za šoferow nakładnych awtow a za sezonowe dźěłowe mocy. Hač do jutřišeho chcetej Sakska a Bayerska wo dalšich wuwzaćach za ludźi rozsudźić, kotřiž dźěłaja we wažnych powołanjach.
Róžowa póndźela w Kölnje
Köln (B/SN). Dokelž póstniske ćahi lětsa wupadnu, přewjedźechu přećah dźensa w miniaturnej formje a klanki w póstniskich kostimach přez město rejowachu! Wot lěta 1802 zahorjatej legendarnej a typiskej klance na kijach Tünnes a Schäl Kölnskich wobydlerjow. Při tym rěčitej wonej w Kölnskim dialekće. Ze sydom do wósom kilometrow dołhim póstniskim přećahom z něhdźe 10 000 wobdźělnikami bě w zašłych lětach Kölnjanski ćah najwjetši w cyłej Němskej. Lětsa stejachu we wulkej hali jenož 16 miniaturnych póstniskich wozow. Róžowa póndźela je wusko z katolskej cyrkwju zwjazana. Swjedźeń wotměje so stajnje póndźelu do popjelneje srjedy. Wot 11. do 19. lětstotka počesćichu bamžojo njedźelu do róžoweje póndźele zasłužbne wosobiny ze złotej róžu. Dokelž wotměwaše so hłowna zhromadźizna karnewalskich towaršnosćow přeco póndźelu po tutej njedźeli, pomjenowachu ju norojo róžowu póndźelu.
Čěska nuzowy staw wukazała
Praha (dpa/SN). Čěska je nětko tola dramatiskich ličbow infekcijow z koronawirusom dla nuzowy staw wukazała. Wón płaći wotnětka 14 dnjow, zdźěli mjeńšinowe knježerstwo ministerskeho prezidenta Andreja Babiša. Knježerstwo wotpowěduje tak próstwje wšitkich 14 zarjadniskich regionow kaž tež Prahi. Wuwzaćny staw měješe so poprawom minjenu nóc skónčić. Ze swojim rozsudom spřećiwja so knježerstwo woli parlamenta, kiž bě wotpokazał lockdown podlěšić.
Žada sej ministra wotwołać
Berlin (dpa/SN). Městopředsyda FDP Wolfgang Kubicki je sej hladajo na dlijace so wupłaćenje pjenježneje podpěry hospodarstwu koronapandemije dla žadał, hospodarskeho ministra Petera Altmaiera (CDU) ze zastojnstwa wotwołać. „To je so tak prawje nimokuliło. By derje było, bychmy-li druheho čłowjeka w tej zamołwitosći měli“, rjekny Kubicki wčera w telewiziji. „Altmaier je wina, zo njejsu předewzaća přilubjene pomocne srědki přeco hišće dóstali.“
Prěni zaměr šćěpjenja docpěty
Šiman za nowy logistiski centrum
Budyšin (SN/MkWj). Zapósłanc CDU w Sakskim krajnym sejmje Marko Šiman předewzaćelow we Łužicy namołwja, čěskim powołanskim dojězdźowarjam nachwilnje kwartěr w Němskej wobstarać. Tak móhli wšitcy zhromadnje přichodne tři tydźenje wobmjezowanja koronawirusa dla přetrać. Trěbne negatiwne testy na koronawirus su dojězdźowarjam wulke brěmjo, dokelž dyrbja zdźěla hodźiny dołho při testowanskich centrumach čakać. To rjekny Šiman minjeny pjatk na internetnej nowinarskej konferency w Budyšinje. „Sakska ma tež w tuchwilnej koronakrizy wšědnje 12 000 dojězdźowarjow z Čěskeje a Pólskeje. W časach do krizy bě jich dwójce telko. Do Hornjeje Łužicy jězdźi wšědnje 1 000 ludźi z Čěskeje a 4 000 z Pólskeje. Ličby pokazuja, kak wažne dźěłowe mocy ze susodneju krajow su.“
Kretschmer: Žane jězby k jutram
Berlin/Drježdźany (dpa/SN). Sakski ministerski prezident Michael Kretschmer (CDU) a strowotniski fachowc SPD Karl Lauterbach njewidźitaj žanu móžnosć, jutry někajke dowolowe jězby přewjesć. „Sym za to, wěrnosće wuprajić: Lětsa njezmějemy bohužel žadyn jutrowny dowol“, rjekny Michael Kretschmer nowinje Bild. „Wulka mobilita hižo w aprylu je jěd. Bychmy wšitko zničili, štož smy docpěli.“
Karl Lauterbach praji nowinje Welt: „Wuchadźam z toho, zo njemóžemy lětsa wokoło jutrow na dowol jěć.“ Jutrowne tydźenje měli so wužić, kontakty redukować a tak hrožacu třeću žołmu koronapandemije wotwobarać.
Ministerski prezident Schleswigsko-Holsteinskeje Daniel Günther (CDU) porno tomu nima jutrowny dowol za wohroženy. Wón pokazuje na minjenu konferencu ministerskich prezidentow, hdźež su jasny jězbny plan wotewrjenja gastronomije a hotelow schwalili. To njesměło so ani tydźeń po tym hižo zaso do prašenja stajeć, Günther šwika. Tež Lěwica Kretschmera kritizuje.
Ta wěc z tej wěrnosću
To a tamne (15.02.21)
Zaso jako roznošowar nowin dźěłać móže 80lětny George Baley we Wulkej Britaniskej, a to dźakowano elektriskemu kolesu. Nětko móže z 25 km/h po puću być a njetrjeba so ćělnje tak napinać. Po swojich 80ćinach chcyše Baley rańše roznošowanje po dobrych štyrjoch kilometrach poprawom skónčić. Hižo jako jědnaćelětny bě sej wón tak něšto přizasłužił. Po powołanskim žiwjenju na bursy bě roznošowanje jako rentnar přewzał.
W Choćebuskim awtokinje su čłonojo wólbneho wokrjes Choćebuz-Sprjewja-Nysa Maju Wallstein minjeny pjatk wječor za načolnu kandidatku SPD k wólbam zwjazkoweho sejma lětsa w septembru wuzwolili. Koronapandemije dla dyrbjachu sej za wólby tónkróć kmane městno pytać. Čłonojo wuprajichu so jednohłósnje za 34lětnu. Dotalny zapósłanc SPD Ulrich Freese njebě hižo kandidował.
Wočakuja nawal ludźi
Waršawa (dpa/SN). W Pólskej wočakuja po nowym wotewrjenju hotelow a sněhakowarskich arealow hoberski nawal ludźi na centrumy zymskeho sporta. Jeničce w znatym měsće Zakopane w Tatrach liča kónc tydźenja z hač do 20 000 hosćimi. Tež w druhich kónčinach registruja wjele skazanych přenocowanjow. Knježerstwo bě tydźenja wobzamknyło, zo smědźa hotele a pensije wot dźensnišeho hosći witać, zo maja pak kapacitu na 50 procentow wobmjezować.
Přećiwo zawrjenu mjezow
Berlin (dpa/SN). Ministerska prezidentka Porynsko-Pfalcy, Malu Dreyer, je so w boju přećiwo koronapandemiji přećiwo tomu wuprajiła, mjezy k susodnym krajam koronawirusa dla zaso zawrěć. „Nochcemy, zo so mjezy zaso zawěraja. Chcemy pandemiju zhromadnje ze susodami přewinyć, rjekny politikarka SPD dźensa w rańšim magacinje sćelaka ZDF. Badensko-württembergski ministerski prezident Winfried Kretschmann (Zeleni) njebě zawrjenje mjezow wjace wuzamknył.
Jubilejne posedźenje
